Лукашэнка даў Чыжу год на завяршэнне экс-Kempinski

Будаўніцтва шматфункцыянальнага комплексу з элітным гатэлем каля цырка ў Менску падоўжанае да канца 2015 года.

Адпаведны ўказ Лукашэнка падпісаў 12 лістапада. Ім уносяцца змены і дапаўненні ва ўказ ад 11 траўня 2010 г. №243, які даваў старт пачатку будаўніцтва аб'екта ў квартале праспект Незалежнасці - вуліца Янкі Купалы - рака Свіслач.

З дакумента таксама выдаленая назва гатэлю - «Кемпінскі». Першапачаткова яго павінны былі пабудавана да чэмпіянату свету-2014 у хакеі. Цяпер у ўказе фігуруе безназоўны гатэль.

Некалькі месяцаў таму міжнародны гатэльны брэнд Kempinski разаслаў ліст са свайго цэнтральнага офіса, паведаміўшы, што «яны не будуць кіраваць гатэлем» у Менску. Хаця яшчэ вясной і ў пачатку лета кампанія «Кей Эм Лакшэры Хотэл/Кемпінскі Плаза Мінск» набірала супрацоўнікаў. Але, як паведаміў адзін з удзельнікаў гэтага працэсу, у ліпені прадстаўнікі кампаніі «замарозілі» падбор персаналу.

Заказчыкам будаўніцтва гэтага шматфункцыянальнага комплексу ў Менску з'яўляецца кампанія «Эліт Эстэйт». Гэта даччынае прадпрыемства групы кампаній «Трайпл» беларускага алігарха Юрыя Чыжа.

Крыніцы TUT.by паведаміла, што ў перамовах паміж «Трайпл» і Kempinski паўсталі цяжкасці. Цяпер беларуская кампанія вядзе перамовы з іншымі прадстаўнікамі.

У ГК «Трайпл» адмовіліся ад каментароў.

Скандальны гатэль у 2012 годзе стаў каменем перапоны пры абмеркаванні краінамі ЕЗ санкцый у дачыненні да рэжыму Лукашэнкі. Тады абмяркоўваліся менавіта абмежавальныя меры супраць шэрагу беларускіх алігархаў. У выніку, міністры ЕЗ дамовіліся пашырыць санкцыі і дадаць да спісу 21 чалавека - суддзяў і сілавікоў.

Адно з дзяржаў супольнасці - Славенія - тады выступіла супраць уключэння ў яго вядомага алігарха Юрыя Чыжа, чыя сфера інтарэсаў уключае шмат кірункаў - ад рэстаранаў да будаўніцтва і нафтаперапрацоўкі. Паводле неафіцыйнай версіі, гэта адбылося праз тое, што краіна спрабавала абараніць інтарэсы адной са сваіх будаўнічых кампаній-Rico, якая выйграла кантракт на будаўніцтва буйнога жылога і офіснага комплексу ў цэнтры Менска. Яго цэнтрам і павінен стаць новы гатэль «Кемпінскі».

Фота: «Радыё Свабода»