Бабулька з Любліна уваскрэсла ў моргу праз 11 гадзін пасля смерці

Састарэлая жыхарка Польшчы, чыю смерць засведчыў мясцовы лекар, невытлумачальным чынам ажыла ў моргу.

На днях дадому да 91-гадовай Яніны Калькевіч з горада Вострава Любельскага ў Люблінскім ваяводстве прыйшла пляменніца Багуміла, каб прыгатаваць ёй сняданак. Калі 51-гадовая Багуміла зайшла ў пакой цёткі, то выявіла, што тая не дыхае. Пульс не адчуваўся, вочы былі заплюшчаныя, рот закрыты. Багуміла выклікала сямейнага лекара. Лекарка засведчыла смерць бабулькі, выпісаўшы афіцыйнае сведчанне, паведамляе BBC.

Пахаванне планавалася правесці праз два дні. Родныя пачалі падрыхтоўку да цырымоніі, у той час як цела памерлай даставілі ў мясцовы морг.

Праляжаўшы 11 гадзін у халадзільніку, мех, у якім знаходзілася цела Яніны Калькевіч, раптам пачаў варушыцца, чым прывёў у здзіўленне персанал морга.

Як распавялі пазней сваякі ўяўнай нябожчыцы, прыкладна апоўначы ў іх доме пачуўся званок. На парозе стаяў служачы морга, які і распавёў ім пра ўваскрэсенне бабулькі.

Калі Яніну Калькевіч прывезлі дадому, цётка, са слоў пляменніцы Багумілы, працягвала скардзіцца на холад і папрасіла кубак гарачай гарбаты.

Хатняя лекарка з амаль 30-гадовым досведам працы, якая выпісала пасведчанне аб смерці пані Калькевіч, заявіла аб сваёй поўнай упэўненасці ў тым, што тая памерла. Паводле яе слоў, пацыентка не дыхала, сэрца не білася, і «не было ніякіх сумненняў у тым, што яна памерла». Паліцыя Вострава Любельскага абвясціла аб пачатку расследавання.