Новы генплан Менска: У цэнтры перастануць будаваць шматпавярховікі
10- 14.11.2014, 10:50
- 11,618
Канчатковы генплан сталіцы будзе гатовы да сакавіка будучага года.
- Горад будзе развівацца як гарадская агламерацыя з гарадамі-спадарожнікамі - патлумачыў намеснік старшыні камітэта архітэктуры і горадабудаўніцтва Мінгарвыканкама Павел Лучыновіч. Менавіта гарвыканкам і КУП «Мінграда» - аўтары праекта новага генплана сталіцы, піша «Комсомольская правда в Беларуси».
Новы Генплан разлічваецца з таго, што да 2030 года ў Менску будзе жыць два мільёны чалавек. Дарэчы, цяпер у сталіцы пражывае 1,921 мільёна беларусаў. Фактычна кожны пяты жыхар краіны.
Горад будуць разгружаць праз шэсць гарадоў-спадарожнікаў (Дзяржынск, Заслаўе, Лагойск, Смалявічы, Фаніпаль і г.п. Рудзенск). Распрацоўшчыкі генплана прапаноўваюць іх спецыялізаваць.
- Гэта не будуць проста спальныя раёны, такія своеасаблівыя гета - кажа Павел Лучыновіч. - У планах стварыць у іх працоўныя месцы і інфраструктуру. Да прыкладу, у Фаніпалі плануецца машынабудаўнічыя вытворчасці. Рудзенск, дзе ёсць вялікія электрычныя магутнасці, стане таксама прывабным для інвестараў. Ёсць варыянт пераносу Менскага райвыканкама ў Заслаўе, што таксама створыць там рабочыя месцы.
У Менску жыллё будаваць паступова перастануць. Да 2017 года план па будаўніцтву жылля ў Менску знізіцца з мільёна квадратных метраў да 600 тысяч. Пры гэтым горад, па словах чыноўнікаў, не будзе расці за межы МКАД. Жыхароў чакае ўшчыльненне.
Чыноўнікі адзначылі, што паводле генплану ў цэнтры сталіцы ніякіх новабудоўляў больш не будзе.