Менчукам масава адключаюць камунальныя паслугі за нявыплату

Толькі за апошні месяц жорсткім мерам уздзеяння з боку камунальнікаў падвергліся жыхары больш за паўтысячы сталічных кватэр.

Генеральны дырэктар ГА «Менская гарадская жыллёвая гаспадарка» Віталь Смірноў падчас пасяджэння штаба добраўпарадкавання і ўтрымання гарадскіх тэрыторый агучыў наступныя лічбы. У Менску ад камунальных паслуг за іх неаплату адключана 867 кватэр, у тым ліку за апошні месяц - 581 кватэра, піша «Інтэрфакс».

Усяго ў сталіцы паводле стану на 13 лістапада налічвалася 19.932 асабовыя рахункі з пратэрмінаванай запазычанасцю. Агульны доўг - больш за Br6,5 млрд. Спецыяліст падкрэслівае: суадносіны жыхароў, якія ігнаруюць жыроўкі на працягу некалькіх месяцаў, і злосных неплацельшчыкаў за апошні час не змяніліся.

Злосных неплацельшчыкаў, якія ігнаруюць жыроўкі, што паступаюць на працягу трох і больш гадоў, у Менску сягоння 66, у той час як у пачатку 2014 года іх было 79.

Намеснік старшыні Мінгарвыканкама Уладзімір Кухараў на вышэйзгаданым пасяджэнні штаба падкрэсліў: тэмп актыўнай барацьбы з даўжнікамі ЖКГ зніжаць нельга. На ягоную думку, пасля 3-4 месяцаў падобнай практыкі сталічным уладам «удасца выпрацаваць сістэму і прызвычаіць жыхароў да своечасовай аплаты камунальных паслуг».

Раней сталічная мэрыя выступіла з ініцыятывай ва ўзмацненні жорсткасці мер у дачыненні да грамадзян, якія маюць запазычанасць у аплаце жыллёва-камунальных паслуг. У прыватнасці, пра падвышэнне пені за пратэрміноўку камунальных плацяжоў з цяперашніх 0,3% ад агульнай сумы ў дзень да 30%. Таксама ў Менгарвыканкаме прынятая пастанова ў абавязковым парадку рабіць адключэнне жыллёва-камунальных паслуг тым, хто завінаваціўся за іх больш чым за два месяцы. Як бачым, яна выконваецца.

Напрыканцы - інфармацыя да разважання. З пачатку года ў судовым парадку прынятыя 18 пастаноў аб высяленні жыхароў з займаных памяшканняў паводле артыкула 86 Жыллёвага кодэкса Рэспублікі Беларусь.

Гэты артыкул гаворыць: наймальнік жылога памяшкання дзяржаўнага жыллёвага фонду і якія пражываюць сумесна з ім сямейнікі, якія маюць без паважных прычын шасьцімесячную запазычанасць у плаце за ЖКП і плаце за карыстанне жылым памяшканнем, за рэдкім выключэннем падлягаюць высяленню ў судовым парадку з падачай ім іншага жылога памяшкання меншай плошчы або якое саступае ранейшаму жыллю ў спажывецкіх якасцях. Пры гэтым выгляд і тэрмін дзеяння раней заключанага дагавора найму захоўваецца.

Як варыянт - наймальнік-даўжнік і ягоная сям'я могуць быць падвергнутыя ў судовым парадку прымусоваму абмену займанага імі жылога памяшкання на жылое памяшканне меншай плошчы, у якім праз дагавор найму пражываюць грамадзяне, якія стаяць у чарзе на большую кватэру.