Аляксей Улюкаеў: Расея рыхтуецца абмежаваць экспарт нафты

Урад РФ занепакоены падзеннем коштаў на нафту.

Расейскі ўрад прапрацоўвае варыянты дзеянняў на выпадак увядзення абмежаванняў на экспарт нафты, паведаміў у інтэрв'ю BBC міністр эканамічнага развіцця Расеі Аляксей Улюкаеў.

Ён таксама прызнаў, што зніжэнне коштаў на энерганосьбіты можа сур'ёзна адбіцца на радавых грамадзянах і кампаніях. Пры гэтым, на ягоную думку, расейскі бюджэт сур'ёзна не пацерпіць, так як зніжэнне коштаў балансуецца курсам рубля.

"Я веру ў людзей і ў жыццёвую мудрасць. Я не думаю, што санкцыі супраць Расеі стануць больш жорсткія, але мы прадугледзелі такую магчымасць у некаторых нашых прагнозах. Мы прапрацоўваем сцэнар магчымага абмежавання экспарту расейскага газу і нафты", - сказаў Улюкаеў.

Улюкаеў таксама падкрэсліў, што падзенне коштаў на нафту турбуе расейскія ўлады.

"Справа не толькі ў велічыні, справа ў валацільнасці. Валацільнасць уплывае на ўсе планы інвестараў. Адна справа, калі вы думаеце, што ў вас прыбыткі будуць вылічацца з сумы 100 даляраў за барэль, іншае - 80 даляраў. Многія інвестыцыйныя праекты ў гэтай сітуацыі не могуць пачынаць рэалізоўвацца, таму што няясныя перспектывы", - растлумачыў міністр.

Раўнавага цэн

Паводле слоў Улюкаева, дакладныя доўгатэрміновыя прагнозы цэн на нафту зрабіць практычна немагчыма. Міністр спадзяецца, што ў найбліжэйшай будучыні будзе знойдзеная новая раўнавага нафтавых коштаў.

"За мінулыя 10 гадоў яна была 100+, то ёсць крыху больш за 100 даляраў за барэль з нейкімі ваганнямі. Думаю, што новая раўнавага будзе на ўзроўні 100-, то ёсць трохі менш за 100 даляраў за барэль, але я не чакаю нейкага драматычнага зніжэння", - растлумачыў кіраўнік мінэканамразвіцця.

Як адзначае Улюкаеў, прыватныя прадпрыемствы і кампаніі ў новых умовах адчуваюць сябе менш абароненымі. Гэта, з ягоных словаў, можа знізіць інвестыцыйны попыт і спажывецкі попыт, што, безумоўна, негатыўна ўплывае на дынаміку ВУП.

"Каб зберагчы эканоміку ад гэтага, мы развіваем сістэму праектнага фінансавання, розных спосабаў фандавання інвестараў, каб даць ім нейкія гарантыі реалізуемасці іх інвестыцыйных праектаў і тым самым павялічыць інвестыцыйную актыўнасць", - кажа міністр.