Намесніка старшыні Аршанскага райвыканкама затрымалі п'яным за стырном

Канстанціна Селіванава пазбавілі пасведчання на тры гады.

Пасля распачатай крымінальнай справы на Івана Хурбатава, апошні быў адхілены ад пасады намесніка старшыні Аршанскага райвыканкама, а яго абавязкі стаў выконваць галоўны архітэктар Аршанскага раёна Канстанцін Селіванаў. Аднак, на гэтым месцы праблемы пачаліся і ў яго, піша orsha.eu.

Спачатку ў жніўні гэтага года Канстанціна Ігаравіча затрымалі супрацоўнікі ДАІ за кіраванне аўтамабілем у нецвярозым стане. 2 верасня Аршанскі РАУС вынес адміністрацыйную пастанову ў справе - пазбавіць грамадзяніна Селіванава пасведчання на 3 гады і пакараць штрафам у памеры 8,25 млн рублёў.

А 31 кастрычніка аўтамабіль галоўнага архітэктара ў двары дома па вуліцы Пагранічнай ў Воршы падчас паркоўкі нанёс пашкоджанні тром прыпаркаваным машынам суседзяў. Сам Канстанцін Селіванаў запэўнівае, што за стырном быў не ён, міліцыя гэта правярае.

І як стала вядома, 3 лістапада Канстанцін Селіванаў вызвалены ад займаных пасадаў.