Анатоль Шумчанка: Для многіх ІП рост адзінага падатку стане апошняй кропляй

Уладальнікі рынкаў і гандлёвых цэнтраў б'юць трывогу: людзі сыходзяць з бізнэсу. А хто не сышоў цяпер, сыдзе ў сакавіку.

Сёння стала вядома пра ініцыятыву, якую вылучыў Менгарвыканкам аб надыходзячым грамадскім абмеркаванні павышэння стаўкі адзінага падатку для індывідуальных прадпрымальнікаў, падчас якога ўсіх зацікаўленых запрашаюць выказацца пры дапамозе электроннай пошты. Са слоў старшыні грамадскага аб'яднання «Перспектыва» Анатоля Шумчанкі, таксама адбудзецца сход ІП на базе Менгарвыканкама. Ён пройдзе 20 лістапада а 10:00 па вуліцы Мяснікава, 39. Прадпрымальнік сцвярджае, што настроі ў «іпэшнікаў» цяпер вельмі негатыўныя: людзі не разумеюць, куды ўжо далей можна іх «душыць», бо і так гандлю практычна больш няма.

- Я аб'ездзіў рынкі, гандлёвыя цэнтры, пагаварыў з прадпрымальнікамі і высветлілася вельмі цікавая рэч. У прадпрымальнікаў пасля 1 сакавіка 2015 няма «жыцця». Яны для сябе акрэслілі «край» сваёй дзейнасці, выбраўшы гэтую дату. Напрыклад, калі канфіскоўвалі ў прыватнікаў тавар, і побач стаяла жанчына і плакала, яна ў сэрцах сказала, што хацела дарабіць да 1 сакавіка, а потым «вы ж разумееце, я ж не змагу працаваць». Іншыя прадпрымальнікі кажуць: «Чаму яны нам падаткі падвышаюць на тры месяцы? Мы ж працуем толькі да першага сакавіка!». Гэта значыць, прадпрымальнікі ўжо вызначылі для сябе свой канец кар'еры і працы.

- Гэта праўда, што ўжо цяпер ІП спыняюць сваю дзейнасць і рынкі апусцеюць?

- Так, да нас пачынаюць паціху звяртацца ўладальнікі гандлёвых цэнтраў і рынкаў. І яны пачынаюць сігналізаваць аб тым, што ўпала колькасць наведвальнікаў рынкаў, вызваляюцца гандлёвыя месцы... Прадпрымальнікі сыходзяць. Урад сваімі дзеяннямі, пра што мы і папярэджвалі год таму, ужо нанёс вялізныя страты. Толькі цяпер мы пачынаем гэта адчуваць. Людзі сыходзяць з бізнэсу, скарачаюцца гандлёвыя месцы. Натуральна, працоўныя месцы не ствараюцца.

Прывяду маленькі рэальны прыклад: у чалавека было тры гандлёвыя месцы, якія ён трымаў з усіх сіл - дзесьці пазычаў грошы, браў крэдыты. Пасля таго, як ён даведаўся, што будзе 1 сакавіка, ён два месцы з трох закрывае і пакідае адно рэнтабельнае месца, якое пракорміць яго сям'ю хоць бы на бліжэйшы перыяд. І такіх прадпрымальнікаў - дзясяткі тысяч! Улады нанеслі непапраўны рэпутацыйны ўрон беларускаму бізнэсу. Таму не варта здзіўляцца таму, што цяпер адбываецца. Такога ніколі не было, каб у гандлёвых цэнтрах і на рынках было столькі пустых месцаў. Прычым у цэнтры горада! І гэта ўжо не сакрэт.

- 8 снежня пройдзе чарговы Форум прадпрымальнікаў. Чаго вы будзеце патрабаваць ад уладаў?

- З боку некаторых можа здавацца, што Форум - гэта дробязі, пагаварылі - і разышліся, але гэта не так. Усё гэта адсочваецца. І чым вышэйшы будзе градус і большая колькасць удзельнікаў - тым больш шанцаў, што на нас не спусцяць сабак. На кожным гандлёвым аб'екце ёсць актывісты, мы хутка пачнём раздаваць інфармацыйныя ўлёткі. Сёння выказаць сваю пазіцыю - ужо ўчынак для многіх. А праблем шмат, сітуацыя трывожная, але каб праблемы развязаць, трэба быць разам. Наша асноўная задача - гэта дамагчыся таго, каб дзяржава дала магчымасць рэалізоўваць рэшткі без якіх-небудзь тэрмінаў. Няхай яна перапіша што заўгодна, але пакіне нам тавар. Людзі кажуць: «У нас няма гандлю, мы нават не можам прадаць у гэты тэрмін рэшткі». Многія абураюцца: «Ну і куды нам цяпер гэтыя рэшткі? У ўтыль?». Калі дзяржава набудзе ў нас гэтыя рэшткі, мы гатовыя ёй іх прадаць.

- Менгарвыканкам хоча павялічыць адзіны падатак для менскіх ІП на 25%. Чаму толькі для менскіх?

- Як правіла, падаткі павялічваюцца сінхронна. Калі павышэнне стаўкі адзінага падатку на 25% адбудзецца для менскіх ІП, то пазней мы гэта будзем назіраць ва ўсіх абласцях.

- Што такі рост падатку будзе азначаць на практыцы? Гэтая лічба ўжо дакладная?

- У мінулым годзе хацелі падняць падатак на 40%. Мы папрасілі на 15%. У выніку паднялі на 17%. У гэтым годзе хочуць падняць на 25%, мы напісалі на 12%, а наколькі падымуць - будзе відаць. Але рост падатку прывядзе да таго, што ўрад сваімі рукамі разгоніць інфляцыю, бо гэта будзе азначаць рост спажывецкіх коштаў. І каму гэта сёння трэба? Мы ў сваім звароце так і напісалі: пара спыніць гэтую гонку коштаў, інфляцыі і падаткаў. Хопіць! Давайце спрабаваць жыць па-чалавечы. Мы кошты не будзем падвышаць, калі вы не будзеце нас душыць падаткамі. Гэта падвышэнне падатку адсячэ чарговую частку прадпрымальнікаў, якія не вытрымаюць. Бо для многіх прадпрымальнікаў гэта можа стаць апошняй кропляй да той ракі, якая сёння цячэ ў выглядзе дакументацыі, сертыфікацыі і агульнага абурэння з нагоды 1 сакавіка.