Die Zeit: Пуцін наважыў спаліць усе масты

Прэзідэнт Расеі паводзіць сябе так, быццам хоча спаліць усе масты.

Пра гэта пішуць нямецкія СМІ, паведамляе DW.

Газета Die Zeit публікуе каментар Матыяса Гайса (Matthias Geis) пад загалоўкам «Саміт» вялікай дваццаткі»: пад ценем Пуціна». Аўтар мяркуе, што расейскаму прэзідэнту відавочна прыйшлася па душы роля дрэннага хлопца сусветнай палітыкі. Інакш навошта б ён акурат да саміту адправіў да берагоў Аўстраліі расейскія баявыя караблі? Далей Маціяс Гайс згадвае пра тое, што апошняя размова канцлеркі Нямеччыны Ангелы Мэркель з расейскім прэзідэнтам Пуціным, якую давялося весці на саміце, была ўжо 37 па ліку.

«Досвед паказвае, што не толькі безвыніковыя, але і, здавалася б, паспяховыя перамовы з Пуціным што да Украіны ў канчатковым выніку сканчаюцца нічым, - адзначае Гайс. - Ці разумее Пуцін, што гэта ў перспектыве значыць для ягонай рэпутацыі як Дагаворнага боку? Бо ён не проста блакуе пастановы, але і ірве на шматкі ўжо дасягнутыя дамоўленасці, як быццам ніколі іх сур'ёзна і не прымаў. у Брысбене Пуцін быў практычна ізаляваны. Ён паводзіць сябе так, быццам хоча спаліць усе масты». «Ангела Мэркель у сваёй размове ў Брысбене не выпадкова згадала Малдову і Грузію - краіны, якія Расея таксама залічвае да сваёй зоны ўплыву. Сапраўды гэтак жа, як і ва Украіне, Пуцін прымяняе да іх стратэгію запалохвання. Цяпер новы ледніковы перыяд у стасунках паміж Пуціным і Захадам надыходзіць усё хутчэй. Менавіта таму, што Захад ясна ўсведамляе, што ў канфлікце ва Украіне няма вайсковага развязвання, ён павінен праяўляць цвёрдасць», - гаворыць Гайс ў газеце Die Zeit.

Аглядальнік газеты Süddeutsche Zeitung Штэфан Карнэліус піша: «Пуцін цяпер перасцерагае, што санкцыі нанясуць шкоду самому Захаду, а Дума абмяркоўвае ўвядзенне закона аб экспрапрыяцыі маёмасці заходніх інвестараў, - піша Карнэліус на старонках Süddeutsche Zeitung. - Але ж гэтыя крокі сведчаць як раз пра тое, наколькі балюча санкцыі ўдарылі па Расеі, а іх патэнцыйнае ўзмацненне жорсткасці відавочна прыводзіць многіх у неапісальны жах. Пуцін толькі ў абмежаваных межах можа выкарыстоўваць нафту і газ у якасці інструменту ціску. А калі пад ударам апынецца ўся алігархічная сістэма, то ціск Захаду ударыць і па Пуціну». На думку аналітыкаў, Расея вядзе гібрыдную вайну, робячы ўчынкі, ад якіх заўсёды можна адхрысціцца.

Фота: Getty Images