Галоўны камуніст В'етнама ляціць у Беларусь
7- 18.11.2014, 16:53
- 5,000
Генеральны сакратар Цэнтральнага камітэта Камуністычнай партыі В'етнама Нгуен Фу Чонг 26-27 лістапада наведае з афіцыйным візітам Беларусь.
Пытанні падрыхтоўкі візіту абмяркоўваліся на сустрэчы 18 лістапада начальніка ўпраўлення Азіі, Аўстраліі і Акіяніі МЗС Беларусі Андрэя Грынкевіча з паслом В'етнама ў Беларусі Да Ван Маем. Пра гэта сайту charter97.org паведамілі ў прэс-службе МЗС Беларусі.
Напярэдадні ў Менску пад старшынствам намесніка міністра замежных спраў Беларусі Валянціна Рыбакова адбылося пасяджэнне беларускай часткі Беларуска-в'етнамскай міжурадавай камісіі ў гандлёва-эканамічным і навукова-тэхнічным супрацоўніцтве.
Падчас пасяджэння разгледжаны пытанні рэалізацыі выніковага пратаколу папярэдняга (дзясятага) пасяджэння камісіі, Праграмы супрацоўніцтва паміж Беларуссю і В'етнамам у эканамічнай сферы на 2013-2015 гады.
Абмеркаваныя пытанні актывізацыі двухбаковых гандлёва-эканамічных сувязяў, развіцця стасункаў у галіне прамысловасці, сельскай гаспадаркі, адукацыі, навукова-тэхнічнай і фінансава-банкаўскай сферах, а таксама падрыхтоўкі да адзінаццатага пасяджэння камісіі, якое плануецца правесці ў Хашыміне 3-4 снежня ў перыяд правядзення нацыянальнай экспазіцыі Беларусі (3-6 снежня) у рамках міжнароднай выставы замежнага гандлю Vietnam Expo-2014. Тут таксама адбудзецца чарговы раўнд палітычных кансультацый з Міністэрствам замежных спраў В'етнама.