Махляр прапаноўваў кіроўцам заправіцца за паўцаны і знікаў з грашыма

Мянчук прадстаўляецца дальнабойнікам.

Пра гэта паведамілі charter97.org у прэс-службе ГУУС Менгарвыканкама.

"У Фрунзенскае РУУС сталіцы паступіла каля дзясятка заяў аб тым, што нейкі малады чалавек на аўтазапраўцы падыходзіць да кіроўцаў, прадстаўляецца дальнабойнікам і прапануе заправіцца амаль за паўцаны. Узяўшы перадаплату, ён прызначае сустрэчу, напрыклад, за гаражамі. Кіроўцы, якія пагадзіліся на здзелку, не знаходзілі яго ва ўмоўленым месцы. Падобныя выпадкі адбыліся на некалькіх сталічных АЗС", - адзначылі ў прэс-службе ГУУС.

Супрацоўнікі аддзела крымінальнага вышуку Фрунзенскага РУУС высветлілі асобу падазраванага ва ўчыненні ашуканскіх дзеянняў. Цяпер 30-гадовы мянчук затрыманы. Малады чалавек нідзе не працуе, раней судзімы за махлярства, паўгода таму вызваліўся з месцаў пазбаўлення волі.

Правяраецца дачыненне мужчыны да аналагічных злачынстваў.

"Калі вы пацярпелі ад дзеянняў махляра, звяртайцеся ў Фрунзенскае РУУС асабіста", - сказалі ў міліцыі.