Берасцейская міліцыя шукае актывістаў за ўборку могілак
25- 18.11.2014, 19:11
- 27,570
Міліцыя выкарыстоўвае фотаздымкі ўдзельнікаў акцый для ажыццяўлення рэпрэсій.
Старшыні партыі БНФ паступіў запыт з УУС Берасцейскага аблвыканкама. Міліцыя просіць падаць асабістыя звесткі актывістаў, якія адлюстраваныя на фота пад матэрыялам аб добраўпарадкаванні Балахаўскіх могілак.
«Па заканчэнні уборкі запалілі свечкі ў памяць загінулых салдат і на фоне адной з магіл размясцілі «бела-чырвона-белы »сцяг», - адзначаецца ў запыце, паведамляюць «Беларускія навіны».
Дакумент падпісаны намеснікам начальніка АУС адміністрацыі Ленінскага раёна Берасця А.В. Кугачам.
«Натуральна, што «ўстановачныя звесткі грамадзян» мы ім не дамо. У нас іх няма, і пра гэта рыхтуем адказ, - адзначаецца на старонцы Партыі БНФ у сацыяльных сетках. - Але ў апошні час органы палітычнага пераследу актывізавалі выкарыстанне фатаграфій удзельнікаў акцый для ажыццяўлення рэпрэсій. Як раз цяпер распачатыя адміністрацыйныя справы ў дачыненні да актывістаў БНФ і іншых партыяў з Гародні, Ліды, Кобрына, якія прымалі ўдзел ва ўвекавечанні памяці паўстанцаў 1863 года ў Свіслачы».