Зыгмантовіч аб новым трэнеры: Думаю, знойдуць кагосьці

В.а. галоўнага трэнера беларускай футбольнай зборнай Андрэй Зыгмантовіч не ведае, якая будучыня чакае яго ў ёй.

«Думаю, знойдуць кагосьці. Хтосьці будзе трэніраваць», - прыводзіць словы спецыяліста БелаПАН.

Адказваючы на пытанне, ці гатовы ён застацца ў трэнерскім штабе, калі такая прапанова паступіць, Зыгмантовіч адзначыў: «Не будзем прыспешваць падзеі. Паступіць прапанова, тады і буду разважаць. Любы трэнер, які зойме гэты пост, апынецца пад каласальным ціскам з боку прэсы, спецыялістаў. Магчыма, гэта і правільна. Шмат у чым крытыка змушае нас рухацца наперад».