«Шчаслівы час» у «аранжавым вярблюдзе» скончыўся бойкай

Пакупнікі не змаглі падзяліць тавары.

Пра гэта гаворыцца ў паведамленні на старонцы крамы «Аранжавы вярблюд» у сацыяльнай сетцы «Фэйсбук».

«На жаль, акцыя «шчаслівы час» выклікала занадта шмат негатыўных рэакцый, - гаворыцца ў ім. – Праз ажыятаж, які ўзнік у гадзіны правядзення акцыі, некаторыя кліенты праявілі агрэсію і нястрыманасць ў дачыненні адзін да аднаго і персаналу крамы. Дайшло да выпадкаў рукапрыкладства, абразаў і псуты маёмасці крам. Некалькі рэчаў былі парваныя кліентамі, што не падзялілі іх».

Адміністрацыя крамы заклікала дарослых не падаваць сваімі паводзінамі дрэнны прыклад для дзяцей.

«Наша кампанія працуе з дзіцячай групай тавараў, а ўсё, што тычыцца дзяцей, павінна несці станоўчыя, добрыя эмоцыі, - гаворыцца ў паведамленні. - Мы імкнемся развіваць у дзецях павагу да людзей, тлумачыць неабходнасць паводзіць сябе годна ў любых сітуацыях. А прыкладам для дзяцей служаць паводзіны дарослых. Таму мы не павінны і не будзем падтрымліваць сітуацыі, якія могуць правакаваць ганебныя паводзіны дарослых».

У сувязі з інцыдэнтам «Аранжавы вярблюд» вымушаны завяршыць акцыю датэрмінова.