Электронныя цыгарэты не пазбаўляюць ад нікацінавай залежнасці

Электронныя цыгарэты наносяць такую ж шкоду арганізму, як і звычайныя, лічаць беларускія навукоўцы.

Пра гэта сёння журналістам паведаміла намеснік галоўнага ўрача Рэспубліканскага цэнтра гігіены, эпідэміялогіі і грамадскага здароўя Людміла Наройчык, паведамляе карэспандэнт БелТА.

"Навукова даказаных фактаў, што электронныя цыгарэты бясшкодныя для чалавека, няма. Аднак ёсць шмат падстаў сцвярджаць, што яны наносяць такую ж шкоду арганізму, як і звычайныя цыгарэты. Бо ў большасці выпадкаў у е-цыгарэтах таксама ўтрымліваецца нікацін, які выклікае прывыканне. Людзі, пераходзячыя на электронныя цыгарэты, у выпадку іх адсутнасці паляць звычайныя, таму што застаецца прывыканне да самога працэсу. Гэта не той выпадак, які дапамог бы пазбавіцца ад нікацінавай залежнасці", - сказала Людміла Наройчык.

Паводле слоў спецыяліста, у электронных цыгарэтах таксама ёсць іншыя дабаўкі: араматызатары, прапiленглiколь, гліцэрын, якія для ўдыхання вельмі непажаданыя. Акрамя таго, праведзеныя ў ЗША даследаванні даказалі прысутнасць у электронных цыгарэтах рэчываў, якія аказваюць агрэсіўнае ўздзеянне на дыхальныя шляхі, у прыватнасці рэчыва, падобнага ў складзе на антыфрыз.

"СААЗ і Міністэрства аховы здароўя іншых краін усё больш прыходзяць да думкі, што трэба забараніць распаўсюджванне і выкарыстанне электронных цыгарэт. Такая тэндэнцыя фарміруецца ў свеце", - сказала намеснік галоўнага ўрача.