Аўтасалон «Форд» у Маскве: Пакупнікоў з Беларусі стала ў 10 разоў больш

Беларусы масава скупляюць іншамаркі ў Расеі.

Апошнім часам у інтэрнэце з'явілася поўна аб'яў накшталт «Прывязём аўто з Расеі, гарантыя афіцыйнага дылера». На сайтах з прыватнымі аб'явамі, дзе ў асноўным гандлююць ужыванымі аўто, з'яўляюцца аўтамабілі з расейскімі нумарамі і прыпіскі «прывязу любое аўто пад заказ», піша «Комсомольская правда в Беларуси».

Кажуць, такая купля выгадная. Бо ў Расеі той жа ПДВ складае 18%, а ў нас - 20%. Акрамя таго, са слоў беларускіх аўтасалонаў, у суседзяў ніжэйшы ўтылізацыйны збор, які ў нашым выпадку закладваецца ў цану пакупкі. Дадайце да гэтага дэвальвацыю расейскага рубля...

Заходзім на сайты беларускіх і расейскіх аўтадылераў. Параўноўваем кошты. Па самых бюджэтных мадэлях у базавай камплектацыі розніца складае 2 - 5 тысяч даляраў. Напрыклад, «Рэно Логан» расейскай зборкі ў Менску каштуе ад 12 тысяч даляраў, а ў Маскве - ад 7,8 тысячы. Выгада відавочная нават з улікам дарогі.

- Беларускіх пакупнікоў стала больш, - распавялі ў аддзеле продажаў маскоўскага аўтасалона, які спецыялізуецца на продажах аўтамабіляў «Мазда». - Яшчэ летам мы прадавалі беларусам да сямі аўто ў месяц, а цяпер - да 25. Гэта прыкладна чвэрць ад агульных продажаў. Бяруць ўвесь мадэльны шэраг, нават дарагія асобнікі.

У аўтасалоне «Форд» распавялі, што масавы паток беларусаў за аўтамабілямі пачаўся каля двух тыдняў таму.

- Раней у нас за месяц аўтамабіль купляў, напрыклад, адзін кліент з Беларусі, а цяпер ужо прадалі 10 штук. Лічыце, струмень кліентаў ад вас павялічыўся ў 10 разоў! Адзінае, у нас ёсць абмежаванне. Так, прадстаўніцтва «Форд» у Расеі забараняе прадаваць аўтамабілі грамадзянам замежных дзяржаў. Таму пры куплі беларусы пішуць заяву, што аўтамабіль стане на ўлік і будзе эксплуатавацца толькі на тэрыторыі РФ.

Беларусы не заўсёды ставяць на вашы аўтамабілі расейскія нумары.

- Гэта заява фактычна з'яўляецца парадай. Гэта значыць, вы едзеце ў Беларусь на нашым аўто і ставіце яго на ўлік ужо ў сваёй краіне. Хіба што ПДВ вы не зможаце вярнуць. Але нават з гэтай умовай, наколькі мне распавядалі кліенты, у Расеі ўтамабілі больш танныя, чым у вас, - сказалі ў салоне.

Не ўсе новыя аўто з Расеі будуць абслугоўваць беларускія аўтасалоны

Купляючы аўтамабіль у беларускім аўтасалоне, вы атрымліваеце тры гады сэрвіснага абслугоўвання ў афіцыйнага дылера. Такі ж сэрвіс вы атрымаеце і ў выпадку куплі аўто ў РФ, але не заўсёды. Па-першае, трэба купіць аўто толькі ў афіцыйнага дылера. Для гэтага трэба знайсці прадстаўніцтва канкрэтнай маркі аўтамабіля ў Расеі. Як правіла, на сайтах кампаній размешчана інфармацыя з адрасамі аўтасалонаў, якія з'яўляюцца афіцыйнымі прадстаўнікамі. Па-другое, удакладніце ў беларускім салоне, ці прымуць яны на абслугоўванне набыты ў Расеі аўтамабіль. Так, да прыкладу, аўто маркі «Кіа» і «Хендэ» (апошні мае права прайсці ТА, але не атрымае гарантыю) абслугоўваюцца толькі ў РФ. А прадстаўнік «Мазды» ў Беларусі патрабуе сэрвісную кніжку, выдадзеную ў папяровым выглядзе і правільна (!) запоўненую. Гэтыя нюансы могуць папросту з'есці ўсю выгаду ад куплі аўто ў суседняй краіне.