Жыхары Гомеля скардзяцца на землятрус

Ваганні, якія дасягалі 2-3 балаў, маглі адчуць у кватэрах верхніх паверхаў вышынных дамоў у паўднёвых абласцях Беларусі.

Гамяльчук Юрый Шаўцоў, засняў падпалены балід, на наступны дзень, 22 лістапада, стаў сведкам яшчэ адной рэдкай для Беларусі з'явы, піша «Комсомольская правда в Беларуси».

- Дзесьці а 22.30 я адчуў, як дом хіснула некалькі разоў. Я пачаў шукаць інфармацыю ў інтэрнэце, на сайтах, на якіх выкладваюць сейсмічную актыўнасць у рэальным часе, яшчэ нічога не было, але даслоўна хвілін праз дзесяць пачалі з'яўляцца паведамленні аб 5-бальным землятрусе у Румыніі. Мы жывем на апошнім, дзевятым, паверсе панэльнага дома, таму, магчыма, і адчулі нешта, - кажа ён.

У Цэнтры геафізічнага маніторынгу НАН Беларусі пацвердзілі, што землятрус, які адбыўся ў той вечар у Румыніі і Малдове, дакаціўся не толькі да Украіны, але і да Беларусі:

- Фокус рассейвання хваль закрануў вялікія тэрыторыі, нашы прыборы зарэгістравалі ваганні ў паўднёвай частцы Беларусі, паведамленні пра іх прыходзілі з Гомельскай і Берасцейскай абласцей. Ваганні, якія дасягалі 2-3 балаў, маглі адчувацца ў кватэрах верхніх паверхаў вышынных дамоў.