Жоўтая падводная лодка стварыла 3D-карту антарктычных ільдоў (Відэа)

Дзякуючы падводнаму робату навукоўцам упершыню атрымалася вымераць таўшчыню лёду ў морах вакол Антарктыды.

Папярэднія ацэнкі раставання антарктычных ільдоў, вельмі важныя для разумення глабальнай кліматычнай дынамікі, абапіраліся на звесткі спадарожнікавай здымкі і ледзяныя керны (цыліндрычныя калонкі, што атрымліваюць у выніку свідравання з ледаколаў). Аднак караблям даступныя толькі раёны адносна тонкага лёду, паведамляе Lenta.ru са спасылкай на часопіс Nature Geoscience.

Праводзіць даследаванні лёду «знізу» навукоўцы пакуль не маглі: Дамова аб Антарктыцы 1959 закрыла рэгіён для падводных лодак. Даследчыкам прыйшлося сканструяваць двухкорпусны беспілотны апарат (працуе ён пад кіраваннем сістэмы Linux), які і дапамог стварыць першую трохмерную карту марскога лёду Антарктыкі.

Апарат жоўтага колеру вымяраў таўшчыню лёду з дапамогай радыёлакацыйных імпульсаў свайго санара, на плошчы 1295 квадратных кіламетраў (у морах Уэдэла і Белінсгаўзена і каля Зямлі Уілкса).

Таўшчыня лёду аказалася значна большай, чым думалі навукоўцы: у сярэднім 1,4-5,5 метра. Гэты факт толькі ўскладняе рашэнне праблемы марскога лёду ў Паўднёвым паўшар'і: у Арктыцы за апошнія сорак гадоў ягоная плошча скарацілася прыкладна на 40 працэнтаў, тады як вакол Антарктыды яго становіцца ўсё больш.

Гэта супярэчыць усім кліматычных мадэлям: лічыцца, што глабальнае пацяпленне павіннае выклікаць раставанне льдоў па ўсёй планеце. Магчыма, факты можна растлумачыць тым, што ледніковае покрыва самой Антарктыды актыўна растае, а з-за ружы вятроў, якая змянілася ў апошнія гады, усё больш лёду здзімае з кантынента ў мора, адзначаюць навукоўцы. Акрамя таго, бурныя марскія ветры збіваюць абломкі, якія трапілі ў мора, у новыя крыгі, нагрувашчваючы іх адзін на аднаго.