Музей у Швейцарыі атрымае шэдэўры з калекцыі арт-дылера нацыстаў
2- 25.11.2014, 21:59
- 6,048
Мастацкі музей у Берне пагадзіўся прыняць карціны з калекцыі мастацкіх твораў, раней нарабаваных нацыстамі.
Разам з тым, у калекцыю музея не прымуць ніводнай працы, калі ў адносінах да яе будуць падазрэнні ў тым, што яна адабраная нацыстамі ў законных уладальнікаў, заявіў на прэс-канферэнцыі ў Берліне прэзідэнт Бернскага музея Крыстоф Шойблін, піша BBC.
Калекцыянер Карнеліюс Гурліт (на фота), у кватэры якога быў знойдзены тайнік са зніклымі падчас Другой сусветнай вайны карцінамі, памёр у Мюнхене ў траўні ва ўзросце 81 года.
Выяўленая ў кватэры Гурліта калекцыя з 1400 карцін дасталася яму ад бацькі, які ў часы Трэцяга рэйха быў арт-дылерам нацыстаў.
У мінулым годзе нямецкія паліцыянты правялі рэйд і канфіскавалі карціны, некаторыя з якіх былі перададзеныя бацьку калекцыянера са спустошаных габрэйскіх дамоў.
Сярод знойдзеных палотнаў былі выяўленыя працы Пабла Пікаса, Анры Маціса, Марка Шагала, Эдварда Мунка, Макса Лібермана, Эміля Нольдэ і Паўля Клее.
Першапачаткова лічылася, што ўнікальны збор шэдэўраў быў згублены ў час бамбардзіроўкі Дрэздэна ў 1945 годзе.
Большая частка карцін мастакоў-мадэрністаў была канфіскаваная нацыстамі ў 1930-я гады як "дэгенерацыйнае мастацтва" і лічылася незваротна страчанай.
Паводле папярэдніх звестак, агульны кошт знойдзеных у кватэры палотнаў складае каля мільярда еўра.
Незадоўга да смерці Карнеліюс Гурліт заключыў пагадненне з уладамі Нямеччыны, прапанаваўшы дапамогу ў пошуках законных спадчыннікаў першапачатковых гаспадароў карцін.
Іншыя спадчыннікі?
Аднак Гурліт быў настолькі абураны тым, як з ім абыходзіліся ўлады Нямеччыны, што ён змяніў сваё завяшчанне, даручыўшы распараджацца калекцыяй швейцарскаму музею, якому трэба будзе разбірацца з прэтэнзіямі спадчыннікаў законных уладальнікаў.
На спадчыну Гурліта прэтэндуе таксама ягоная 86-гадовая стрыечная сястра Ута Вернер. Яна патрабуе ад суду Мюнхена прызнаць, што Гурліт змяніў завяшчанне на карысць швейцарскага музея ў момант абмарачэння розуму і таму яно не мае сілы, а маёмасць павінная быць падзеленая паміж сваякамі.
Паводле слоў адваката Вернер, яе падтрымліваюць астатнія сваякі.
Гурліт ніколі не ажаніўся і не меў дзяцей.