Раснафта набывае ў Total долю ў буйным НПЗ у Нямеччыне

Нафтаперапрацоўчы завод у Шведцэ вырабляе дзясятую частку бензіну на рынку Нямеччыны.

Расейская кампанія «Раснафта» набывае ў французскай кампаніі Total долю ў 16,7 адсотка ў нафтаперапрацоўчым прадпрыемстве PCK Raffinerie GmbH Schwedt, размешчаным у нямецкім горадзе Шведцэ, паведамляе «Нямецкая хваля».

Дакументы, якія абумоўліваюць асноўныя ўмовы ўгоды, падпісалі ў пятніцу, 28 лістапада, кіраўнік «Раснафты» Ігар Сечын і галоўны выканаўчы дырэктар Total Патрык Пуяне.

Прадпрыемства ў Шведцэ з'яўляецца адным з найбуйнейшых нафтаперапрацоўчых заводаў у Нямеччыне. Яго бензінам запраўляецца кожны дзясяты аўтамабіль у краіне.

У 2013 годзе «Раснафта», паводле ўласных звестак, паставіла ў ФРГ 23,3 мільёна тон нафты, што складае 26 адсоткаў усяго нафтавага імпарту ў Нямеччыне.