Былы намеснік старшыні Вайсковага суда абвінавачваецца ў карупцыі

2 снежня ў Вярхоўным судзе пачнецца працэс паводле крымінальнай справы ў дачыненні да былога намесніка старшыні Вайсковага суда, які абвінавачваецца ў атрыманні хабару.

Пра гэта паведамляе прэс-служба Вярхоўнага суда, не называючы прозвішчы фігуранта.

Паводле звестак Naviny.by, гаворка ідзе пра палкоўніка юстыцыі ў адстаўцы Юрыя Тузава. Аб распачынанні крымінальнай справы ў дачыненні да яго раней не паведамлялася.

Паводле звестак прэс-службы ВС, былы намеснік старшыні Вайсковага суда абвінавачваецца паводле ч. 3 арт. 430 КК (атрыманне хабару). Яму пагражае пакаранне ў выглядзе пазбаўлення волі на тэрмін ад 5 да 15 гадоў. Падрабязнасці стануць вядомыя падчас слуханняў справы, працэс адкрыты.

Мяркуючы паводле адкрытых крыніц, намеснікам старшыні Вайсковага суду Юрый Тузаў стаў у 2007 годзе. У той час вайсковую Феміду ўзначальваў сапраўдны генеральны пракурор Аляксандр Канюк.

Ад пасады суддзі і намесніка старшыні Вайсковага суду Юрый Тузаў быў вызвалены на падставе заключэння Вышэйшай кваліфікацыйнай калегіі суддзяў Вярхоўнага суда ад 28 сакавiка 2014 года. У заключэнні паказвалася - «у сувязі з выхадам у адстаўку па стане здароўя, які перашкаджае выкананню службовых абавязкаў».

Вайсковыя суды ў Беларусі былі скасаваныя 1 ліпеня 2014 дэкрэтам Лукашэнкі №6 ад 29 лістапада 2013 «Аб удасканаленні судовай сістэмы Рэспублікі Беларусь».

Юрый Тузаў амаль не згадваўся ў беларускіх СМІ. У лістападзе 2009 года ў каментары для «Народнай газеты» з нагоды карупцыі ў органах памежнай службы, ён сказаў: «У большасці сваёй асуджаныя паводле карупцыйных спраў – людзі, якія першапачаткова станоўча характарызуюцца, інтэлектуальна развітыя і адукаваныя. Але яны не змаглі справіцца са спакусай, не змаглі перамагчы ў сабе карыслівыя падахвочванні...»