Менчукі пратэстуюць супраць «самабуда» ў Заходнім пасёлку

Узвесці два шматпавярховікі на скрыжаванні вуліц Пляханава і Васняцова пасярод прыватнага сектара гарадскія ўлады мелі намер даўно.

Жыхары Заходняга пасёлка былі не супраць. Але замест абяцаных дзевяці паверхаў першы дом абзавёўся дзевятнаццаццю. Гэта і нарадзіла зацягнуты канфлікт, падчас якога стала вядома - вышыннасць дома незаконная. Учора адбылася чарговая сустрэча варагуючых бакоў - жыхароў пасёлка, дольшчыкаў і прадстаўнікоў гарадской улады, піша onliner.by.

Праектам дэталёвага планавання ад 28 жніўня 2008 года №1966 прадугледжанае будаўніцтва двух дзевяціпавярховых жылых дамоў на 48 кватэр кожны. Кампанія «Атлант-М Буд» работы пачала ў 2012 годзе. Пазней горадабудаўнікі прапанавалі «ўшчыльніцца» - замяніць дзевяціпавярховікі двума аднолькавымі 19-павярховымі маналітна-каркаснымі дамамі, якія складаюцца з 133 кватэр. Праект прайшоў дзяржаўную экспертызу, забудоўшчыку была выдадзеная дазвольная дакументацыя на будаўніцтва. Жыхароў пра змены папярэдзіць забыліся. Пакуль уносіліся змены ў праект, першы дом ужо вырас.

Пра тое, як будаўніцтва адбывалася ў рэальнасці, а не на паперы, распавяла жыхарка Заходняга пасёлка:

- Трывогу мы забілі, калі на этапе ўзвядзення 9-га паверха працы чамусьці не спынілі. Без лішняга шуму ўзвялі 12-й паверх. Праз час дом вырас да 19-га паверха. Работы вяліся падазрона хутка - мы нават зрэагаваць не паспелі. У інстанцыі пачалі звяртацца, калі будаваўся дзясяты ўзровень. Сёння 19-павярховы самабуд ужо гатовы.

Лісты ў пракуратуру далі вынік: было ўстаноўлена, што пры распрацоўцы, разглядзе і ўзгадненні праектнай дакументацыі дапушчаныя парушэнні.

- У выніку замест 48 кватэр у доме маецца 133. Уяўляеце, колькі лішніх аўтамабіляў трэба дзесьці паркаваць. Атрымаўся 19-павярховы «выкідак», - прадаўжае аповед сябра ініцыятыўнай групы Вікторыя. - «З'еў» паркавую зону - гэта недапушчальна. Паўгода таму пачалося ўзвядзенне другога дома. Нашымі намаганнямі будоўля была прыпыненая ў красавіку.

Раней у дамы Заходняга пасёлка сялілі працаўнікоў заводаў. Сёння сітуацыя змянілася, і я разумею, чаму цікавасць інвестараў да гэтай тэрыторыі вырасла. Загрузка заводаў паменшылася, экалогія палепшылася - вось яны і ламануліся.

Калі б дамы засталіся дзевяціпавярховымі, як нам і абяцалі, мы б не выступалі. Выяўляецца, для забудоўшчыкаў ёсць асобная заканадаўчая база. Мы не супраць забудовы - мы супраць беззаконня!

Жыхары асцерагаюцца, што шматпавярхоўкі зрэжуць ландшафтна-рэкрэацыйную зону Сляпянскай воднай сістэмы, стануць перашкодай сонечнага святла, прывядуць да дадатковага зносу прыватнага сектара, а насельніцтва, якое прыбыла, апануе паліклінікі і школы, якіх і без таго не хапае.

Але «ахвярамі абставін» сталі людзі і з процілеглай пазіцыяй - дольнікі, якія ўклалі грошы ў метры, будаўніцтва якіх сёння прыпынена. Бессэнсоўны сход, які прывёў ледзь ці не да махання кулакамі, перапыніла адна з дольнікаў:

- Мяне цікавіць толькі адно - будзе будавацца дом ці не! Я хачу ведаць, калі я туды засялюся. У вас ёсць жыллё, а ў мяне няма! - паступіў рытарычны зварот да жыхароў Заходняга пасёлка.

Для ўдзелу ў долевым будаўніцтве маладая мама Юлія была вымушаная прадаць старую кватэру. Сямейнае наваселле планавалася адзначыць ўжо ў канцы 2015 года. Сёння ясна, што наваселля не атрымаецца.

- У другім доме да 30 траўня прададзеныя першыя чатыры паверхі, - падзялілася Юлія. - За кватэры ўнесеная 100%-ная аплата. Наша трохпакаёвая кватэра абышлася ў $1300 за кв. м. Будаўніцтва дома не вядзецца ўжо паўгода. Прыпынены продаж кватэр. А людзі тым часам улезлі ў даўгі, прадалі кватэры і аўтамабілі, узялі крэдыты...

Абурэнне жыхароў пасёлка незразумелае. На месцы пабудаванага дома і будпляцоўкі стаялі баракі, якія былі знесеныя, а іх жыхароў шчасна рассялілі.

Зразумелага дыялогу на сустрэчы не адбылося. Прысутныя на сходзе прадстаўнікі Камітэта архітэктуры і горадабудаўніцтва Менгарвыканкама, Менскага гарадскога Савета дэпутатаў і адміністрацыі Заводскага раёна засталіся незадаволеныя:

- Складваецца адчуванне, што ваш інтарэс абмяжоўваецца тым, каб прыйсці, пакрычаць, звярнуць на сябе ўвагу. Сход, на жаль, не атрымаўся. Адказваць на пытанні бессэнсоўна.

- Пастанова аб будаўніцтве дома №2 будзе прынятая пасля таго, як праект дэталёвага планавання пройдзе ўсе неабходныя экспертызы і будзе зацверджаны на пасяджэнні Менгарвыканкама, - заключылі чыноўнікі.

Этапы ўзгаднення зоймуць не менш за тры месяцы. Увесь гэты час дольнікам трэба будзе правесці ў чаканні хоць якога зруху з мёртвай кропкі будаўніцтва жылля, а жыхарам Заходняга пасёлка - старанна сачыць за актыўнасцю на будпляцоўцы.