У Белавежскай пушчы знайшлі нож часоў неаліту

Тут магла быць сталая або часовая стаянка чалавека.

Крэмневы нож часоў неаліту знойдзены ў Белавежскай пушчы, паведамілі БелТА у нацпарку.

Крэмень незвычайнай формы прыцягнуў увагу супрацоўнікаў навуковага аддзела нацпарка падчас пасадкі яблыневага саду ў Дзмітравічскім лясніцтве. Больш дэталёвы агляд пацвердзіў здагадку навукоўцаў - знаходкай аказаўся крэмневы нож.

Пасля кансультацый з аддзелам археалогіі першабытнага грамадства ДНУ "Інстытут гісторыі Нацыянальнай акадэміі навук Беларусі" было ўстаноўлена, што гэты артэфакт з'яўляецца характэрным для першабытных стаянак эпохі каменнага і бронзавага вякоў.

Акрамя крэмневай пласціны са слядамі апрацоўкі, было знойдзена больш за дзясятак керамічных аскепкаў ад посуду шматвяковай даўніны.

Было тут сталае паселішча або часовая стаянка чалавека, трэба будзе вызначыць навукоўцам з Інстытута гісторыі НАН. Пасля стараннага вывучэння знаходак яны будуць перададзеныя ў музей Белавежскай пушчы, дзе будуць выстаўленыя разам з іншымі артэфактамі дагістарычнай эпохі.

Фота: Андрэй Бубенько