Джон Кэры: Пастановы Расеі вызначаць будучыню санкцый
7- 8.11.2014, 13:44
- 8,234
ЗША і Расея будуць абменьвацца інфармацыяй аб становішчы спраў на ўсходняй мяжы Украіны.
Пра гэта пасля перамоваў з кіраўніком МЗС РФ Сяргеем Лаўровым заявіў Дзяржсакратар ЗША Джон Кэры.
«Абмяжуюся тым, што паміж намі захоўваюцца пэўныя разыходжанні паводле сітуацыі ва Украіне. Мы дамовіліся абмяняцца часткай інфармацыі, якую маем у сувязі з гэтым. Мы таксама дамовіліся працягваць дыялог», - заявіў Кэры ў Пекіне, паведамляе Reuters.
Таксама Дзяржсакратар ЗША выказаў надзею на тое, што замірэнне, дасягнутае Менскімі дамоўленасцямі, застанецца ў дзеянні.
Са слоў Кэры, будучыя пастановы Расеі што да Украіны паўплываюць на тое, ці будуць больш жорсткімі ці скасуюцца ўведзеныя супраць яе абмежавальныя меры.
«Пастановы Расеі вызначаць будучыню санкцый», - адзначыў Кэры.
«Мы спадзяемся, што можна працягваць працэс, які пачаўся ў Менску (дасягненне мірных дамоўленасцей 5 верасня), і з часам мы, магчыма, убачым адвод войскаў, бяспеку на мяжы і вяртанне стабільнасці», - адзначыў Кэры, дадаўшы, што «гэта залежыць ад Расеі».
Сустрэча міністраў адбылася напярэдадні саміту лідараў краін Азіяцка-Ціхаакіянскага эканамічнага супрацоўніцтва.
Удзел у саміце возьмуць прэзідэнты ЗША і РФ, аднак ніякай афіцыйнай сустрэчы амерыканскага і расейскага лідараў не запланавана.