Ігар Эйдман: хвалёныя працэнты падтрымкі Пуціна – міф

Умоўная "прапуцінская большасць" пад уплывам крызісу можа стаць антыпуцінскім.

Пра гэта на сваёй старонцы ў Фэйсбуку напісаў сацыёлаг Ігар Эйдман.

"Прыняў удзел у, як заўсёды цікавай, праграме Міхаіла Сакалова на радыё "Свабода". Рэзюмую тое, пра што я там казаў, а заадно кажу тое, што не паспеў сказаць.

1. Чаму "Форбс" абвясціў Пуціна самым уплывовым чалавекам года?

Памятаю ў часы майго дзяцінства быў такі хуліганскі прыкол. Падыходзіць хуліган да мамчынага сынка, які трымціць ад страху, бярэ яго за грудкі і кажа: "ссыш... значыць паважаеш". Сакрэт "уплывовасці Пуціна" ў страху перад ім. Пуцін перш за ўсё самы небяспечны чалавек у свеце. Ягоны ўплыў грунтуецца на страху перад ягонай непрадказальнасцю, бязглуздзіцай, якія пагражаюць вялікай вайной.

2. Чым стаў для краіны 2014?

2014 можа стаць новым "годам вялікага пералому" - годам пачатку сутыкнення пуцінскай Расеі з Захадам і ўстанаўлення ў краіне агрэсіўнага, блізкага да фашысцкага рэжыму, што знаходзіцца ў стане перманентнай вайны. Далейшая фашызацыя краіны можа страціць кіравальнасць, развівацца лавінападобна і прывесці да вынікаў, нечаканых і небяспечных нават для яе ініцыятараў.

3. Ці падтрымлівае Пуціна пераважная большасць расейцаў?

Хвалёных 85% адсоткаў падтрымкі Пуціна - міф. Пераважная большасць людзей, якія адказваюць сацыёлагам, што падтрымліваюць Пуціна, на самай справе глыбока абыякавыя да ягонай асобы і ўлады. Яны наогул мала цікавяцца палітыкай. Хвалююць іх пераважна ўласныя матэрыяльныя і бытавыя праблемы. Людзі проста імкнуцца засведчыць перад незнаёмымі людзьмі (сацыёлагамі) сваю лаяльнасць да ўлады, даць сацыяльна пахвалёны адказ, здацца "правільнымі", законапаслухмянымі грамадзянамі. У аўтарытарнай краіне наогул цяжка атрымаць адэкватныя адказы на вострыя палітычныя пытанні.

4. Ці трывалы пуцінскі рэжым?

Умоўная "прапуцінская большасць" (якая складаецца, як я пісаў вышэй, зусім не з "да труны адданых" фанатаў) пад уплывам крызісу або нейкіх знешнепалітычных паражэнняў можа стаць антыпуцінскай. Тыя людзі, а іх нават паводле апытанняў сацыёлагаў 15-20%, якія не баяцца заяўляць пра сваю нязгоду з пуцінскім курсам, здольныя пры спрыяльных абставінах перайсці да адкрытай канфрантацыі з рэжымам і пераламаць стаўленне да яго паслухмяна-пасіўнай большасці. Тады пуцінскі рэжым будзе змецены", - напісаў сацыёлаг.