Google паказала «калядны» прататып аўтамабіля-беспілотніка
2- 23.12.2014, 15:25
- 5,204
Кампанія Google прэзентавала ў інтэрнэце першы поўнафункцыянальны прататып аўтамабіля-беспілотніка.
Інфармацыя пра гэта размешчаная ў сацыяльнай сетцы Google+. У блогу гаворыцца, што кампанія падрыхтавала для сваіх прыхільнікаў найлепшы калядны падарунак - першую рэальную канструкцыю прататыпа аўтамабіля-беспілотніка. Прадстаўленую прыладу кампанія назвала першым прататыпам аўто для «цалкам аўтаномнага кіравання», піша Lenta.ru.
Прататып па вонкавым выглядзе ідэнтычны мадэлі, паказанай Google цяперашняй вясной. Але ў папярэдняга прататыпа не было пярэдніх фар, а ў новай версіі яны ёсць і працуюць.
Да таго ж больш ранняя мадэль кіравалася толькі праграмным забеспячэннем, атрымліваючы інфармацыю з датчыкаў, таму ў аўтамабіля не было стырна, тармазоў і педалі газу. Але нядаўна ў Каліфорніі, дзе размяшчаецца Google, заканадаўча замацавалі патрабаванне аб тым, каб кіроўца мог праводзіць непасрэдны фізічны кантроль над аўтамабілем на грамадскіх дарогах, піша блог Novate.
У сувязі з гэтым кампанія наважыла сумясціць у прататыпе педаль, тармазы і стырно з элементамі камп'ютэрнага кіравання і сэнсарамі. У 2015 годзе, са слоў адмыслоўцаў кампаніі, павінна прайсці выпрабаванне аўтамабіля-беспілотніка на дарогах Каліфорніі.
Google-аўтамабіль разлічаны на двух чалавек. Хуткасць руху першых аўтамабіляў - 40 км\ч. Працуе аўтамабіль-беспілотнік на электрычнасці.
Са слоў прадстаўніка кампаніі, ёсць некалькі паспяховых сцэнарыяў працы самакіравальнага электракара. Ён можа быць выкарыстаны для перавозкі недзеяздольных і пажылых людзей, як альтэрнатыва таксі і для бяспечных паездак людзей, якія стаміліся пасля працоўнага дня.