У Віцебску за бел-чырвона-белы сцяг зноў арыштаваны Сяргей Каваленка
10- 25.12.2014, 10:42
- 13,630
Учора ў Віцебску беларускія патрыёты вывесілі на шматпавярхоўцы ў цэнтры горада нацыянальны беларускі бел-чырвона-белы сцяг.
«Сцяг быў вывешаны ў падтрымку Юрыя Беленькага, які цяпер пераследуецца і якога судзяць за шэсце ў Курапаты падчас святкавання Дзядоў. Учора а 16-45 быў затрыманы мой муж Сяргей Каваленка. Ён знаходзіцца ў ІЧУ Віцебска да суду», - паведаміла charter97.org жонка актывіста Кансерватыўна-Хрысціянскай партыі БНФ Алена Каваленка.
Са слоў жанчыны, да затрымання муж патэлефанаваў ёй і паведаміў, што ідзе дадому.
«Але дома ён так і не з'явіўся. У З гадзіны раніцы я патэлефанавала ў ізалятар і там мне пацвердзілі, што ён знаходзіцца ў іх з учорашняга вечара», - распавяла Алена Каваленка.
Нагадаем, актывіст КХП БНФ Сяргей Каваленка неаднаразова арыштоўваўся і адбываў турэмны тэрмін за вывешванне ў Віцебску нацыянальных бел-чырвона-белых сцягоў.
