Рассельгаснагляд узмацніў кантроль за беларускай птушкафабрыкай «Дружба»
1- 25.12.2014, 14:34
- 5,007
Рассельгаснагляд увёў узмоцнены лабараторны кантроль прадукцыі ААТ "Птушкафабрыка Дружба".
Пра гэта гаворыцца ў афіцыйным паведамленні на сайце ўстановы.
"У сувязі з выяўленнем у часе лабараторнага маніторынгу на бяспеку мезафільных аэробных і факультатыўна анаэробных мікраарганізмаў у партыі мяса птушкі, вырабленага ААТ "Птушкафабрыка Дружба", Рассельгаснагляд прыняў за патрэбнае папярэдзіць дзяржаўную ветэрынарную службу Беларусі, а таксама ўвесці рэжым узмоцненага лабараторнага кантролю ў дачыненні да прадукцыі гэтага прадпрыемства", - адзначаюць у Рассельгаснаглядзе.
"Птушкафабрыка Дружба" знаходзіцца недалёка ад аграгарадка Жамчужны Баранавіцкага раёна Берасцейскай вобласці. Гэта прадпрыемства з скончаным цыклам вытворчасці. Гэта азначае, што ўсе працэсы, ад атрымання яек і гадавання маладняку да фасавання і адпраўкі прадукцыі спажыўцу, ажыццяўляюцца ўнутры адной гаспадаркі.
Птушкафабрыка мае ўласныя цэхі бацькоўскай чарады і рамонтнага маладняку, інкубатар, бройлерны цэх, цэхі забою і паглыбленай перапрацоўкі мяса птушкі, а таксама сетку фірмовага гандлю. 158 птушнікаў дазваляюць адначасова ўтрымліваць блізу 3 млн галоў птушкі. Цяпер асартымент прадукцыі налічвае блізка што 300 найменняў.