Cалдацкія маці Расеі: Нашых дзяцей прымушаюць ваяваць супраць Украіны

Расейскія салдаты ўжо паўгода прымаюць актыўны ўдзел у баявых дзеяннях у Данбасе.

Пра гэта ў інтэрв'ю нямецкай газеце Frankfurter Allgemeine заявіла адказны сакратар саюза Камітэтаў салдацкіх маці Расеі Валянціна Мельнікава, піша Инопресса.ру.

"Я ведаю шмат выпадкаў, якія пацвярджаюць гэта, - распавядае Мельнікава. - Нядаўна, напрыклад, да мяне звярнуліся сваякі навабранцаў, якіх адправілі на палігон пад горадам Гукава Растоўскай вобласці, што побач з украінскай мяжой". Там, паводле слоў Мельнікавай, адзін падпалкоўнік проста заявіў вайскоўцам, што ім неабходна падпісаць кантракт, у адваротным выпадку ён сам падпіша яго за іх і адправіць у Луганск. "Гэтую фразу чулі 250 расейскіх вайскоўцаў, адзін з салдатаў адразу ж адправіў яе мне праз тэлефон, пасля чаго мы напісалі скаргу ў вайсковую пракуратуру і Мінабароны, і салдатаў забралі адтуль", - кажа Мельнікава.

"Яшчэ адным доказам з'яўляюцца пасведчанні аб смерці, у якіх паказваюцца такія прычыны, як шматлікія асколачныя раненні і пашкоджанні ўнутраных органаў. Целы вайскоўцаў, якія знаходзіліся ў вайсковай машыне, наогул абгарэлі так, што ідэнтыфікаваць іх не ўяўлялася магчымым. Калі б усё гэта, як сцвярджаюць афіцыйныя крыніцы, было адзінкавымі выпадкамі на вучэннях, вайсковая пракуратура адразу б распачынала крымінальныя справы. Аднак гэтага не адбываецца, так як мы ўжо паўгода вядзем вайну", - распавядае Мельнікава.

Страты расейскага боку складаюць, паводле яе ацэнак, амаль 500 чалавек. "Зразумела, якіх-небудзь афіцыйных лічбаў або дакументаў няма, страты лічацца дзяржаўнай таямніцай, - працягвае яна. - Аднак украінскі бок публікуе звесткі аб уласных стратах, а выкарыстоўваючы пэўныя вайскова-навуковыя формулы і ведаючы страты аднаго з бакоў, можна ацаніць страты іншага. Да таго ж пэўную ролю адыгрывае мой досвед, назапашаны за час дзевяці войнаў". Мельнікава зыходзіць з таго, што страты сярод расейскіх салдат складаюць мінімум 50% ад украінскіх.

Паводле яе слоў, перш за ўсё ва Украіну адпраўляюць вайскоўцаў-дэсантнікаў. "Таксама вядома аб тым, што туды перакінутыя Пячэнгская брыгада марской пяхоты і мотастралковы батальён з Тоцкага раёна. Гэтыя падраздзяленні знаходзяцца ва Украіне без апазнавальных знакаў. Усё гэта супярэчыць расейскім законам, паколькі войска нельга выкарыстоўваць без пастановы Савета Федэрацыі, загаду прэзідэнта і згоды Дзярждумы, - падкрэслівае Мельнікава. - Усё павіннае быць замацаванае ў пісьмовай форме". "Калі ж гэтага не адбываецца, як заяўляе Мельнікава, гэта з'яўляецца ваенным злачынствам і парушэннем Жэнеўскай канвенцыі ў адносінах да ўласных вайскоўцаў. У салдатаў няма ніякіх апазнавальных знакаў як у вайсковага падраздзялення, а гэта значыць, што ўкраінскае войска можа расстрэльваць іх без якіх-небудзь юрыдычных наступстваў. Такім чынам, дзяржава пакідае сваіх салдатаў у бядзе", - канстатуе Мельнікава.

Чаму ўсё гэта не выклікае абурэнне ў Расеі? "Многія людзі сапраўды не ведаюць, што ва Украіне ваююць расейскія войскі, - адказвае Мельнікава. - Асноўная крыніца інфармацыі для простых грамадзян - тэлебачанне, а яно распаўсюджвае максімальна эфектыўна дэзінфармацыю, у адпаведнасці з якой ва Украіне - фашысты, Пуцін - выратавальнік і расейскіх салдатаў там няма. Нават частка карыстальнікаў інтэрнэту адхіляе астатняе як прапаганду. Іншая частка занадта малая".