Папа Рымскі ў каляднай прамове заклікаў да міру ва Украіне

У традыцыйным калядным звароце Папа Рымскі Францішак асудзіў канфлікт ва Украіне.

Пантыфік заклікаў украінцаў "пераадолець напружанасць, пераадолець нянавісць і гвалт і ўстаць на новы шлях братэрства і прымірэння", паведамляе BBC.

Папа таксама выступіў з заклікам да міру, звернутым да жыхароў Лівіі, Нігерыі, Паўднёвага Судана і іншых афрыканскіх рэгіёнаў.

У сваім другім па ліку пасланні Urbi et Orbi ("Гораду і свету") Францішак нагадаў аб гаротным становішчы ахвяр ўзброенага канфлікту ў Іраку і Сірыі. Францішак памаліўся за хрысціян, якія падвяргаюцца пераследу з боку джыхадзістаў групоўкі "Ісламская дзяржава".

Як адзначыў пантыфік, аднаверцы Блізкага Усходу "разам з тымі, хто належыць да іншых этнічных і рэлігійных груп, пакутуюць ад жорсткіх ганенняў".

Важнасць дыялогу

Папа заявіў пра важнасць аднаўлення дыялогу паміж ізраільцянамі і палесцінцамі і асудзіў напады баевікоў Талібану ў Пакістане. Рымскі першасвятар згадаў у сваёй прамове і ахвяр эпідэміі Эбалы ў Гвінеі, Ліберыі і Сьера-Леонэ, падзякаваўшы тых, хто "адважна дапамагаў хворым".

Штогадовы калядны зварот папа на плошчы Святога Пятра ў Ватыкане слухалі дзясяткі тысяч паломнікаў і турыстаў.

Напярэдадні Каляд Францішак нечакана патэлефанаваў уцекачам ў лагер блізу горада Арбіл у іракскім Курдыстане. Пантыфік заклікаў бежанцаў, якіх баевікі групоўкі "Ісламская дзяржава" вымусілі пакінуць свае дамы, не падаць духам, дадаўшы, што ён усім сэрцам з імі.

Пад час імшы Каляднага Вячэрніку у саборы Святога Пятра Францішак таксама заклікаў вернікаў са спачуваннем ставіцца да родных і блізкіх.