БПЦ стварае Лідскую епархію

Новая Лідская дыяцэзія ўтвараецца ў межах Беларускага Экзархата.

Пра гэта БелТА паведамілі ў Беларускай праваслаўнай царкве.

Пастанова аб стварэнні Лідскай епархіі, якую вылучаюць з Навагрудскай, прынятая на пасяджэнні Сінода РПЦ у Маскве пасля адпаведнага дакладу Мітрапаліта Менскага і Заслаўскага Паўла, Патрыяршага экзарха ўсяе Беларусі. "Утварыць у межах Іўеўскага, Лідскага, Астравецкага, Ашмянскага і Смаргонскага раёнаў Гарадзенскай вобласці", - гаворыцца ў сённяшніх часопісах пасяджэння Сінода РПЦ.

Новыя тэрытарыяльныя межы Навагрудскай епархіі будуць цяпер у межах Дзятлаўскага, Карэліцкага, Навагрудскага і Слонімскага раёнаў Гарадзенскай вобласці. Біскуп будзе мець тытул "Навагрудскі і Слонімскі".

Дыяцэзіяльнаму архірэю Лідскай епархіі даецца тытул "Лідскі і Смаргонскі". Ім абраны іераманах Парфірый (Прэднюк), намеснік намесніка Успенскага Жыровіцкага манастыра. "Месца прызначэння і хіратоніі іераманаха Парфірыя (Прэднюка) у біскупа, пасля ўзвядзення яго ў сан архімандрыта, пакінуць на разгляд Патрыярха Маскоўскага і ўсяе Русі Кірыла", - вызначыў Сінод РПЦ.

У Беларускім Экзархаце паведамілі, што іераманах Парфірый (у свеце Прэднюк Алег Сцяпанавіч) нарадзіўся 25 сакавіка 1970 у горадзе Кобрыне Берасцейскай вобласці. Ахрышчаны 5 красавіка 1970 года ў Кобрынскім раёне. З дзіцячага ўзросту разам з бацькамі наведваў храм. У савецкі час прызываўся на тэрміновую вайсковую службу. У 1994 годзе скончыў інстытут з кваліфікацыяй "інжынер-механік". У 2002 годзе скончыў Менскую духоўную семінарыю са ступенню бакалаўра багаслоўя. У гэтым жа годзе быў прыняты ў лік браціі Успенскага Жыровіцкага манастыра. Пазней вучыўся ў Менскай духоўнай акадэміі і абараніў кандыдацкую дысертацыю па пастырскай тэалогіі "Сакрамэнт пакаяння ў жыцці Царквы".

Акрамя таго, вызгначана, што біскуп Смаргонскі Пётр будзе цяпер мець тытул "Дзятлаўскі" і застанецца вікарыем Навагрудскай епархіі.