Аляксандр Рыбак: Спадзяюся, ніколі ў жыцці не ўбачу гэтае журы (Відэа)

Вынікі фіналу нацыянальнага адборачнага тура конкурсу «Еўрабачанне-2015» для многіх сталі нечаканасцю.

Схільнасць журы да беларускага героя Аляксандра Рыбака і шматлікія навіны ў яго падтрымку не пакідалі сумненняў - у Вену ад Беларусі паедуць задорныя прыгажуні з групы «Мілкі». Тым больш, народныя ўлюбёнцы - зомбі-група Sweet Brains - у фінал адбору нават не патрапілі. Сёння пасля паўночы інтрыга развязалася: прадстаўляць Беларусь на міжнародным конкурсе будуць Uzari & Maimuna. Падобна на тое, Аляксандр Рыбак такой пастановы, мякка кажучы, не чакаў. Што і выказаў у сваім развітальным пасланні, піша onliner.by.

«Еўрапейцы выліваюць столькі бруду пра маю радзіму, пра Беларусь. А я абараняю, абараняю, кажу, што там добрая сістэма. Кажуць - якая сістэма? Там усё куплена. Больш не ведаю, што я абараняю», - гаворыцца ў відэа. Спявак распавядае, што выдаткаваў шмат грошай, знайшоў унікальных дзяўчат і напісаў чыстую, шчырую песню, але журы яе «праваліла». «Спадзяюся, што гэтае журы ніколі ў жыцці не ўбачу», - рэзюмуе Рыбак.

Песню My accent нарвежскага музыканта з беларускімі каранямі выконваюць мянчанкі Таццяна Стахоўская і Ганна Рай, Вікторыя Назарка з Горадні, гамяльчанка Таісія Серыкава і Марына Путнікава з горада Горкі. Паводле вынікаў галасавання гледачоў у фінале калектыў апынуўся на другім месцы. Было прадказальна, што журы сваімі галасамі гэтую «несправядлівасць» выправіць. Але яно прызнала перавагу самабытнага спевака і гарачай скрыпачкі ў тандэме Uzari & Maimuna.