Раман Бяссмертны: NATO пара прыдумаць план абароны ад Расеі

Неабходна тэрмінова перагледзець глабальную сістэму бяспекі, каб спыніць Расею.

Пра гэта заявіў лідар партыі «Трэцяя ўкраінская рэспубліка», экс-амбасадар Украіны ў Беларусі Раман Бяссмертны ў сваім артыкуле ў выданні «Новы час». З ягоных слоў, калі гэтага не зрабіць, то NATO будзе бездапаможная, калі Пуцін нападзе на адну з краін Балтыі.

«Апошнім часам стала цалкам відавочна, што Еўропе, ЗША і Украіне трэба неадкладна распрацаваць цэлы комплекс абаронных мер, якія будуць выступаць стрымліваючым фактарам для імперскіх замахаў Расеі, - піша ён. - Трэба рашуча падкрэсліць, што гэта комплекс менавіта абаронных мер.

Яны павінны прадугледжваць камплектацыю ўкраінскага войска адпаведнымі ахоўнымі відамі зброі, радарным абсталяваннем, верталётамі, авіяцыяй і гэтак далей. Гэта павінны быць менавіта абарончыя віды зброі.

Тыя ж танкі - гэта не абарончая зброя. Гэта сродкі для наступу. І калі я бачу танкі на перадавой, то разумею вар'яцтва тых, хто цяпер каардынуе дзеянні ў супрацьстаянні расейскай агрэсіі.

Асобна я заняўся б пытаннем украінскага вайскова-прамысловага комплексу. Украіна да гэтага часу працягвае развіваць постсавецкую, агрэсіўную мадэль ВПК. А калі мы хочам увайсці ў NATO - абаронны блок - то трэба будаваць не танкі, а зброю, якая дазволіць нам абараніць украінскую дзяржаву, наш народ і хаўруснікаў».

Ад таго, наколькі жорстка Захад адкажа на «пробныя камяні» РФ, залежыць, як далёка зойдзе ў сваёй агрэсіі Пуцін, піша Раман Бяссмертны.

«Акрамя таго, ААН і NATO павінны пачаць актыўна працаваць над стварэннем сістэмы і плана дзеянняў у адказ на магчымы напад з боку РФ, - адзначае ён. - Калі вы бачылі нядаўнюю прэс-канферэнцыю Пуціна, вам, як і мне, павінна было стаць відавочным, што ён не спыніцца. Расейскага прэзідэнта панесла: ён відавочна не кантралюе свае эмоцыі, таму ЕЗ, ЗША і Кітаю ёсць над чым папрацаваць. Гэта азначае, што неабходны актыўны дыялог на вышэйшым узроўні, які дазволіў бы стварыць новую сістэму бяспекі, здольную даць адказ на агрэсію з боку любой з краін свету.

Праблема ў тым, што цяперашняя сістэма вайсковых баз NATO на тэрыторыі Усходняй Еўропы была пабудаваная, зыходзячы з абароннай мадэлі, якая дзейнічала да пачатак расейска-ўкраінскай вайны. Яна не разлічана на тое, каб спраўляцца з пагрозай, якую цяпер уяўляюць паводзіны Расеі. Гэта хутчэй сістэма рэагавання на агрэсію з боку мусульманскіх фундаменталістаў, процідзеяння магчымым тэрарыстычным актам. Гэтыя комплексы - аднаразовыя рэчы, і з атакай РФ яны не справяцца.

Калі сёння NATO кажа, што заступіцца за краіны Балтыі, гэта не адпавядае яе магчымасцям. Войскі, раскватараваныя там, разлічаныя на супрацьстаянне тэрарыстам, на разавыя акцыі. Сёння ў Еўропе няма сіл на тое, каб спыніць напад на адну з краін Балтыі.

Успомніце, як Захад дзейнічаў, калі ў Балтыйскае мора заходзілі расейскія караблі - гнеўныя папярэджанні, канвоі і нічога больш. Адбываецца ўварванне ў тэрытарыяльныя вады, на якое ідзе выключна дыпламатычная рэакцыя. І гэта вялікая праблема, паколькі Расея відавочна кідае пробныя камяні. І ад таго, наколькі рашучым будзе адказ Захаду на парушэнне ёю міжнародных правілаў, залежыць тое, як далёка зойдзе ў сваёй агрэсіі Уладзімір Пуцін».