У Віцебску адкрылі «Музей шакаладу»

Віцебскі «Музей шакаладу» дае выставачную пляцоўку для прэзентацыі магчымасцяў беларускіх кандытараў.

Стваральнік музея, сябра Асацыяцыі наймальнікаў і прадпрымальнікаў Віцебскай вобласці Любоў Іванова распавяла, што музей можа адначасова размяшчаць блізу 100 выставачных салодкіх аб'ектаў. Гэта разнастайныя фігуры, выкананыя ў тэхніцы ліцця і больш складаныя, камбінаваныя, а таксама карціны, намаляваныя шакаладам па шакаладу, піша БелТА.

Такой незвычайнай тэхнікай валодаюць толькі дзве мастачкі ў рэспубліцы, і абедзве жывуць у Віцебску: сябра саюза дызайнераў Беларусі Таццяна Голубева і нядаўняя выпускніца Віцебскага дзяржаўнага тэхналагічнага ўніверсітэта Наталля Буяноўская. Астатнія работы выкананыя пераважна вучнямі Віцебскага дзяржаўнага політэхнічнага прафесійнага ліцэя, а таксама майстрамі вытворчага навучання Таццянай Есючэнкай і Аленай Мураўёвай (кіраўнікі гуртка «Сладкоежка» пры ліцэі) і іншымі кандытарамі.

«Мне хацелася, каб больш людзей даведалася, якi цудоўны шакалад робяць у Беларусі і як прыгожа ён можа падавацца. Ці пра тое, што 11 студзеня 2015 беларускаму шакаладу споўніцца 110 гадоў. Усе экспанаты зробленыя з айчыннага шакаладу, з яго ж выкананыя і інфармацыйныя стэнды музея пра гісторыю гэтага ласунку ў нашай краіне», - патлумачыла Любоў Іванова.

Экспанаты ў такім незвычайным музеі будуць пастаянна замяняць. З лёсам старых работ Любоў Іванова пакуль не вызначылася. Адназначна, есці іх нельга, паколькі выстаўляюцца шакаладныя вырабы ў музеі не пад шклом. Але захоўвацца яны могуць доўга. Вядома, што самай старой ў Еўропе шакаладнай постаці, выстаўленай у рыжскім музеі шакаладу «Лайма», ужо 120 гадоў.

Як адзначыла Любоў Іванова, у «Музеі шакаладу» таксама будуць праходзіць майстар-класы. А да 11 студзеня плануецца сюрпрыз. Каб госці музея ўжо з парога маглі атрымаць асалоду ад шакаладнага мастацтвам не толькі візуальна, да ўваходнага квітка прыкладзеная шакаладка.