Рассельгаснагляд: Беларусь не прымае мер

Ветэрынарная служба Беларусі не прымае мер у ліквідацыі прычын паставак небяспечнай прадукцыі.

Пра гэта гаворыцца ў паведамленні Рассельгаснагляду паводле вынікаў праведзенай 28 снежня нарады з удзелам кіраўніка ведамства Сяргея Данкверта, піша БелаПАН.

Сярод іншага на нарадзе былі разгледжаны вынікі «аналітычнага вывучэння прычын і ўмоў, якія прывялі да трапляння ў гандлёвы абарот на тэрыторыі Расеі небяспечнай жывёлагадоўчай прадукцыі, вырабленай беларускімі мяса- і малакаперапрацоўчымі прадпрыемствамі».

«Паводле экспертнай ацэнцы, асноўнай прычынай з'явілася тое, што кампетэнтнымі органамі Беларусі не праводзіцца своечасовая актуалізацыя нарматыўна-прававых актаў у галіне ветэрынарыі і харчовай бяспекі», - гаворыцца ў паведамленні Рассельгаснагляду.

Адзначаецца, што цягам 2014 Рассельгаснаглядам на адрас ветэрынарнай службы Беларусі было накіравана 43 звароты паводле фактаў неадпаведнасці падкантрольнай прадукцыі ў паказчыках бяспекі патрабаванням Мытнага саюза, на якія было атрымана толькі 7 адказаў.

«Нягледзячы на сур'ёзнасць сітуацыі, якая склалася, інфармацыя Рассельгаснагляду своечасова не накіроўваецца цэнтральным апаратам беларускай ветэрынарнай службы і да рэгіянальных службаў, і да вытворцаў для аператыўнага прыняцця адэкватных карэкціровачны мер. Паводле стану на сённяшні дзень беларускім бокам матэрыялы аб ліквідацыі парушэнняў, выяўленых расейскімі інспектарамі падчас апошняй інспекцыі беларускіх прадпрыемстваў, так і не пададзеныя ў Рассельгаснагляд. Пры гэтым гэтыя матэрыялы павінны былі быць пададзеныя не пазней за 23 снежня гэтага года», - канстатуе расейская ўстанова.

Паведамляецца таксама, што 28 снежня Сяргей Данкверт падчас тэлефонных перамоў «паўторна давёў заклапочанасць Рассельгаснагляду па ўсім комплексе двухбаковых стасункаў» да галоўнага дзяржаўнага ветэрынарнага інспектара Беларусі Васіля Півавара.

Нагадаем, на мінулым тыдні памочнік кіраўніка беларускай дзяржавы Аляксандр Радзькоў заявіў журналістам, што пошукам вінаватых у сітуацыі з пастаўкамі беларускай прадукцыі зоймуцца следчыя органы Беларусі і Расеі. Са слоў Радзькова, калі гэтая тэма абмяркоўвалася прэзідэнтамі Беларусі і Расеі ў Маскве, то расейскі кіраўнік адзначыў, што гэтыя пастановы прымаліся без ягонага ведама.

«Таму запрасілі і кіраўніка расейскай мытні, Данкверта (кіраўнік Рассельгаснагляду). І яны спрабавалі апраўдацца. Але як можна апраўдацца Рассельгаснагляду, калі па нейкіх парушэннях вы адразу зачыняеце 21 прадпрыемства, а потым пачынаеце правяраць... А там, высвятляецца, нармальная вытворчасць еўрапейскага ўзроўню з усімі стандартамі, з добрай прадукцыяй. Будуць разбірацца, аж да крымінальных спраў», - сказаў памочнік Лукашэнкі.

А сам Лукашэнка заявіў, што абмежаванне Расеяй транзіту тавараў з Беларусі было ўведзена без ўзгаднення з прэзідэнтам РФ Уладзімірам Пуціным і без ведама Еўразійскай эканамічнай камісіі.