Лукашэнка пра Пуціна: Мы проста сябры

Дыктатар сёння распавёў асобныя дэталі размовы з прэзідэнтам РФ аб праблеме паставак беларускай прадукцыі ў Расею.

«Размова атрымалася жорсткай, але гранічна дзелавой. Але гэта не першае такое абмеркаванне. Гэта кажа не пра тое, што ў нас антаганізм. Мы проста сябры, і мы адзін аднаму можам сказаць у адкрытую тое, што нас хвалюе», - сказаў сёння Лукашэнка.

Ён сцвярджае, што такія сітуацыі будуць узнікаць праз сутыкненні з інтарэсамі расейскіх вытворцаў, якія бачаць у беларускіх першарадных канкурэнтаў, піша АФН.

«Яны не могуць з намі канкураваць ні па якасці, ні па цане, ні па нашай арганізаванасці. Таму ўжываюць такія адміністрацыйныя, часам бандыцкія метады. Мы да гэтага гатовыя. Мы людзі загартаваныя», - заявіў Лукашэнка.

Прадстаўляючы Андрэя Кабякова на пасаду прэм'ер-міністра, Лукашэнка таксама заявіў, што яго на пасаду прапанаваў Міхаіл Мясніковіч, папярэдні кіраўнік урада.

Лукашэнка заявіў, што «ніякай надзвычайшчыны» ў кадравых пастановах, прынятых ім выхадны дзень 27 снежня, не было, гэта не было спантанным крокам.

«Я перахварэў мінімум паўгода гэтымі пытаннямі. Вельмі шмат было сумневаў. Ніхто не лабіяваў ніякія пасады. Да апошняга моманту наогул шмат хто не ведаў, чым ім прыйдзецца займацца. Гэта была асабіста мая пастанова. Але гэта пастанова не з неба ўзялася», - цытуе яго БелТА.

Паводле слоў Лукашэнкі, задоўга да канчатковай пастановы ён звярнуўся з просьбай да прэм'ер-міністра і іншых службовых асобаў (усяго каля 10-13 чалавек) прадставіць сваё бачанне што да складу ўраду.

«У поўным сакрэце (нават не поштай, а канвертам на маё імя), Міхаіл Мясніковіч і многія іншыя паклалі мне на стол сваё бачанне ўрада: хто ў ім павінен быць. Асабіста без усялякіх памочнікаў, супастаўляючы ўсе пункты гледжання, вызначаючы свае адносіны да той ці іншай службовай асобы ў залежнасці ад таго, якія перад ім стаялі задачы і будуць стаяць потым, я прымаў пастановы», - распавёў ён.

З ягоных слоў, на працягу двух месяцаў «парламенту» будзе прадстаўлена праграма дзейнасці ўрада.

Пры гэтым, дадаў Лукашэнка, з Кабякова не здымаецца задача падрыхтоўкі прапаноў у далейшай аптымізацыі органаў дзяржкіравання, чым ён займаўся, працуючы на пасадзе кіраўніка Адміністрацыі прэзідэнта.

«Нам неабходна рашуча пазбавіць дзяржорганы ад дублюючых і неўласцівых ім функцый. Выкарыстоўвайце міжнародны досвед і дзейнічайце, самае галоўнае, з нашай сітуацыі, нашага жыцця. Ніхто не можа паставіць пытанне падвышэння зарплаты дзяржслужачым без аптымізацыі падпарадкаваных вам структур. Аптымізуйце, прыбірайце лішнія функцыі, якія не патрэбныя на тым ці іншым этапе, і дзейнічайце. Прыбіраючы функцыі, мы падвысім дысцыпліну і адказнасць за прынятыя пастановы», - мяркуе Лукашэнка.

Фота: AP