ЗША перакінуць у Еўропу 150 адзінак бронетэхнікі
- 31.12.2014, 9:05
- 5,251
ЗША ў 2015 годзе збіраюцца размясціць блізу 150 танкаў і бронетранспарцёраў у Еўропе. Каля траціны з іх будуць накіраваныя ў Нямеччыну.
Пра гэта паведаміў камандуючы сіламі ЗША ў Еўропе Бэн Хаджэс, паведамляе ZN.ua. З ягоных слоў, пастанова пра павелічэнне колькасці бронетэхнікі ў Еўропе была прынятая яшчэ 2 гады таму і не мае дачынення да канфлікту ва Украіне.
Акрамя паставак танкаў і бронетранспарцёраў у навучальныя цэнтры Нямеччыны, разглядаецца таксама магчымасць размяшчэння бронетэхнікі ў Польшчы, Румыніі і дзяржавах Балтыі. Канчатковая пастанова ў гэтым пытанні яшчэ не прынятая, заявіў Бэн Хаджэс.
"Да канца 2015 года ў нас будзе дастаткова тэхнікі, каб абсталяваць бранятанкавую брыгаду, 3 батальёны і выведвальную роту, артылерыйскі штаб і інжынерна-тэхнічны склад", - адзначыў Бэн Хаджэс.
Нагадаем, 26 снежня ў акваторыю Чорнага мора ўвайшоў амерыканскі баявы карабель Дональд Кук, місія якога - "ўмацаванне міру і стабільнасці ў рэгіёне".