Заўтра Літва ўступае ў еўразону

Літва з 1 студзеня стане 19-ай удзельніцай зоны звароту еўра.

Уступаючы з 1 студзеня 2015 года ў еўразону, Літва выбірае стабільнасць, бяспеку і росквіт. Пра гэта заявіў у сераду ў Бруселі еўракамісар эканамічных і фінансавых пытанняў, падаткаабкладання і мытнага звязу П'ер Масковісі.

Абмен наяўных літаў на еўра для насельніцтва Банк Літвы будзе ажыццяўляць бясплатна без абмежавання ў суме і часе. Камерцыйныя банкі на тых жа ўмовах будуць рабіць абмен на працягу паўгода, а на працягу 60 каляндарных дзён грошы абмяняць можна будзе таксама ў аддзяленнях сувязі дзяржаўнага прадпрыемства "Пошта Літвы" і некаторых крэдытных установах, паведамляе ТАСС.

"Далучаючыся да еўра, літоўскі народ робіць выбар на карысць таго, каб стаць часткай зоны стабільнасці, бяспекі і росквіту. Літва мае вялікі вопыт надзейнай падаткова-бюджэтнай палітыкі і структурных рэформаў, дзякуючы чаму дасягнуты адзін з самых высокіх тэмпаў эканамічнага росту ў Еўропе ў спалучэнні са сталым падзеннем узроўню беспрацоўя. Краіна цалкам у стане квітнець ў зоне еўра", - адзначыў Масковісі.