ФБР абвясціла вайну «лазерным хуліганам»

Усім, хто паведаміць інфармацыю, якая прывядзе да арышту хуліганаў, якія асляпляюць пілотаў лазерамі, абяцаная ўзнагарода ў $10 тысяч.

Прапанова будзе дзейнічаць два месяцы і распаўсюджвацца на 12 найбуйнейшых гарадоў ЗША, дзе часцей за ўсё адбываюцца падобныя інцыдэнты. Матэрыяльнае ўзнагароджанне стане толькі часткай аперацыі ФБР, накіраванай на барацьбу з «лазерным хуліганствам», адзначае CBS News. Таксама спецслужба будзе праводзіць тлумачальную працу з падлеткамі, якія часцей за ўсё становяцца парушальнікамі, піша Lenta.ru.

У апошні час колькасць «лазерных хуліганаў» у ЗША моцна ўзрасла, што звязваюць з патанненнем магутных лазерных указак. Так, у 2013 годзе паведамлялася пра 3960 падобных інцыдэнтаў, гэта значыць каля 11 у дзень. Далёка не ва ўсіх выпадках хуліганаў атрымліваецца знайсці, а як правіла, расследаванне наогул не праводзіцца. Пры гэтым па амерыканскіх законах за асляпленне пілота лазерам можна атрымаць да пяці гадоў турмы і штраф у памеры 11 тысяч даляраў.

Лазерны прамень можа выклікаць галаўныя болі, часовую слепату і нават сур'ёзна траўмаваць вочы. Асабліва гэтыя сімптомы небяспечныя пры ўзлёце і пасадцы. Хоць невядома яшчэ ніводнага выпадку, калі самалёт разбіўся менавіта з-за асляплення пілота лазерам, улады ўпэўненыя, што рана ці позна крушэнне можа адбыцца.