«Новы Насер» Егіпта вырашыў ісці ў прэзідэнты пасля здзелкі з Масквой

Фельдмаршал Абдэль Фатах ас-Сісі, міністр абароны Егіпта, афіцыйна аб'явіць аб вылучэнні ў прэзідэнты краіны на працягу месяца.

Пра гэта ў інтэрв'ю мясцовай газеце «Аль-Ахрам» заявіў старшыня канстытуцыйнай камісіі Егіпта Амр Муса.

Пра тое, што Абдэль Фатах ас-Сісі, прэзідэнцкія амбіцыі якога ўжо даўно абмяркоўваюцца як у Егіпце, так і за мяжой, мае намер пазмагацца за вышэйшую пасаду (барацьба абяцае быць фармальнай - фельдмаршал лічыцца безумоўным фаварытам), стала вядома на мінулым тыдні з кувейцкай газеты «Ас-Сіяса». Выданне сцвярджала, што адпаведны каментар даў сам кіраўнік егіпецкай мінабароны. Зрэшты, у ваенным ведамстве неўзабаве паспяшаліся заявіць, што фармальна пытанне яшчэ абмяркоўваецца і канчатковае рашэнне пакуль не прынята.

Несумненна фельдмаршал мае намер вылучыць сваю кандыдатуру на пасаду прэзідэнта Егіпта на маючых адбыцца выбарах, заявіў Амр Муса. Аднак, па словах старшыні канстытуцыйнай камісіі Егіпта, міністр абароны збіраецца гэта зрабіць у апошні тыдзень лютага ці ў першы тыдзень сакавіка. Адтэрміноўка, падкрэсліў Муса, звязаная з тым, што ас-Сісі да вылучэння на пасаду прэзідэнта мае намер завяршыць некаторыя асабліва важныя справы, за якія ён нясе адказнасць як міністр абароны, галоўнакамандуючы і кіраўнік ваенна-прамысловага комплексу, перадае NEWSru Israel.

Вядома, што на наступным тыдні ас-Сісі і міністр замежных спраў Набіль Фахмі адпраўляюцца з афіцыйным візітам у Расею, дзе павінна быць падпісаная дамова аб закупцы партыі ўзбраенняў на суму каля двух мільярдаў даляраў. Раней егіпецкае выданне «Аль-Масры аль-Юм» паведамляла, што дамова ўжо падпісаная, але, мяркуючы па ўдакладненых дадзеных, яе толькі плануецца падпісаць у найбліжэйшыя дні.

Якія менавіта ўзбраенні Каір мае намер набыць у Маскве, дакладна не вядома. Раней расейскія СМІ паведамлялі пра зацікаўленасць егіпцян у баявых верталётах, самалётах МіГ-29, процітанкавых ракетах.

Менавіта фельдмаршал ас-Сісі лічыцца галоўнай фігурай, якая фактычна зрынула рэжым «Братоў-мусульман», якія прыйшлі да ўлады, варта адзначыць, у выніку першых для Егіпта дэмакратычных выбараў. Аднак ісламісты ў выніку не здолелі заручыцца падтрымкай шматлікай групы суграмадзян, якія не занадта падтрымлівалі Хосні Мубарака, але і не мелі сімпатый да «братоў». І галоўнае, яны не змаглі «перавабіць» на свой бок войска, якое з часоў падзення манархіі стаяла на чале краіны.

Ас-Сісі актыўна выступаў на палітычным і грамадскім «палях бітваў» падчас леташніх крывавых сутыкненняў прыхільнікаў і праціўнікаў «ісламістаў» і застаецца вельмі шанаванай персонай. У сувязі з гэтым пытанне аб тым, хто стане наступным прэзідэнтам Егіпта, для многіх з'яўляецца ўжо вырашаным, ас-Сісі ўжо называюць новым Насерам (Гамаль Абдэль Насер, другі прэзідэнт Егіпта) з прычыны хутка ўзрослай папулярнасці.