Авіяцыя Асада разбамбавала радзіму продкаў прэзідэнта Аргентыны

Сірыйская авіяцыя нанесла каля дзесяці удараў па тэрыторыі вакол горада Ябруд, размешчанага недалёка ад Дамаска.

Гэты раён знаходзіцца пад кантролем паўстанцаў, піша «Корреспондент».

У прыватнасці, арганізацыя Syrian Observatory for Human Rights, якая сочыць за грамадзянскай вайной у Сірыі, заявіла пра 13 авіяўдараў па Ябруду і яго наваколлях. Ніякай інфармацыі аб ахвярах і пацярпелых яна не дала.

Мясцовы жыхар па імі Амер распавёў, што авіяўдары суправаджаюцца наступам сухапутных войскаў.

У горадзе Ябруд да гэтага часу не адбывалася маштабных сутыкненняў паміж паўстанцамі і ўрадавымі сіламі. Аднак нядаўна туды перамясцілася групоўка Фронт аль-Нусра, якая з'яўляецца прадстаўніком Аль-Каеды ў Сірыі, тады як урадавыя сілы разам са сваімі саюзнікамі з ліванскай Хізбалы пачалі наступ на кантраляваныя паўстанцамі тэрыторыі ў гарах Каламун.

Ябруд мае стратэгічна важнае значэнне. Ён размешчаны недалёка ад ліванскай мяжы, і праз яго праходзіць дарога з Дамаска ў Хомс, дзе зараз праходзяць жорсткія баі. Ябруд вядомы тым, што адтуль родам бацькі былога прэзідэнта Аргентыны Карласа Менэма.

Грамадзянская вайна ў Сірыі працягваецца з вясны 2011 года. Яе ахвярамі сталі ўжо больш за 136 тысяч чалавек, а мільёны былі вымушаныя пакінуць свае дамы і перабрацца ў больш бяспечныя часткі краіны або за мяжу. Намаганні міжнароднай супольнасці па мірным урэгуляванні канфлікту пакуль не прынеслі поспехаў.