Максім Жбанкоў: У ЕГУ дыктатура нічым не лепш лукашэнкаўскай

Супрацоўнікі ЕГУ ўпэўненыя, што ў ВНУ працягнуцца скарачэнні кадраў.

Член Сената і выкладчык універсітэта Максім Жбанкоў пракаментаваў заяву адміністрацыі аб пачатку працэдуры конкурсу для адбору выкладчыкаў, у якім, разам з гэтым, адзначаецца, што Сенат стварае перашкоды для яе правядзення, а яго прадстаўнікі «адкрыта ачарняюць кіраўніцтва і кіруючыя органы ўніверсітэта», а таксама маніпулююць студэнтамі і запалохваюць іх, перадае «Радыё Свабода».

На думку Максіма Жбанкова, у заяве мноства скажэнняў фактаў, і яна маніпулятыўная па сваёй сутнасці.

«Там напісана, - адзначае ён, - што «група выкладчыкаў выкарыстала свае пасады ў Сенаце, каб перашкодзіць арганізацыі адкрытага конкурсу». Але большасць дэмакратычнага Сената - гэта не група выкладчыкаў. Мы занялі свае месцы ў Сенаце ў выніку дэмакратычнай працэдуры выбараў. З гэтага вынікае, што мы прадстаўляем інтарэсы большасці выкладчыкаў ЕГУ. Адміністрацыі проста выгадна прадстаўляць нас у інфармацыйнай прасторы невялікай групай. А на самой справе гэта масавая незадаволенасць курсам адміністрацыі».

Што тычыцца адкрытага конкурсу, то, згодна са Статутам ЕГУ, яго цалкам павінен рыхтаваць Сенат.

«На практыцы мы маем тое, што Сенат ад гэтай працэдуры адхілены, а адміністрацыя ўсё вырашае сама. Нам яна прапануе проста далучыцца да рэформаў. Таму калі адміністрацыя піша, што «прапаноўвала Сенату ўнесці ўклад у гэты працэс», то яна хітруе. Фактычна адміністрацыя нам прапаноўвала ўдзельнічаць у працэсе, які запланавала яна і на сваіх умовах. Натуральна, мы на гэта не згодныя, таму што гэта парушэнне правілаў існавання акадэмічнай установы», - тлумачыць выкладчык.

Жбанкоў пацвердзіў: супрацоўнікі ЕГУ ўпэўненыя, што звальненне Паўла Церашковіча - гэта толькі пачатак чарады звальненняў, у выніку якіх універсітэт будзе пазбаўляцца менавіта ад беларускіх выкладчыкаў.

«Цяпер мы існуем у сітуацыі, - кажа выкладчык, - калі адміністрацыя абсалютна не хавае, што будуць скарачэнні кадраў, перш за ўсё беларускіх. І гэта сцвярджэнне зыходзіць менавіта ад адміністрацыі. Мы проста агучваем гэтыя намеры, але гэта не паклёп, як пра гэта піша адміністрацыя ў чарговай заяве. Таксама там ёсць сцвярджэнне, што мы агучваем ультыматумы кіруючым органам і пагрозы арганізаваць забастоўку. На самой справе, гэта таксама падмена паняццяў. Гаворка ідзе аб вотуме недаверу, які быў падтрыманы абсалютнай большасцю на пазачарговым пасяджэнні Сената. Вотум недаверу быў выказаны двум прарэктарам Аляксандру Калбаску і Бярнардасу Гайлюсу. А прапанова рэктару Анатолю Міхайлаву - выйсці ў ганаровую адстаўку. Гэта знак павагі да яго былых дасягненняў і ўказанне, што цяпер сітуацыя выглядае катастрафічна. Таму гэта не ўльтыматум, гэта пазначэнне канкрэтнай сітуацыі».

Па словах члена Сената, пагрозы і запалохванні ідуць менавіта ад прадстаўнікоў адміністрацыі. Выкладчыкаў палохаюць звальненнем, студэнтаў - спыненнем фінансавання ўніверсітэта ў выніку пратэстных акцый.

«Здзіўляе і пасаж пра нагнятанне страху з боку Сената ў дачыненні да студэнтаў. Мне здаецца, усё наадварот. Чым, калі не нагнятаннем страху, з'яўляецца тэрміновае звальненне кіраўніка Сената, прафесара Паўла Церашковіча пасярод навучальнай сэсіі?

Недвухсэнсоўнае папярэджанне аб звальненні ад свайго кіраўніка Віргіса Валенцінавічуса атрымала таксама лектар Дэпартамента сацыяльных і палітычных навук Таццяна Чуліцкая. Студэнты кажуць, што таксама сутыкаюцца з пагрозамі з прычыны магчымага ўдзелу ў акцыях у падтрымку Сената. Мы ведаем, што ў бліжэйшы час рыхтуюцца чарговыя звальненні нязгодных. Я ведаю, што я таксама ў гэтым спісе. Гэта і ёсць самае сапраўднае нагнятанне страху. Такім чынам, сучасны ЕГУ - гэта адміністрацыйная дыктатура. Па сутнасці, нічым не лепш лукашэнкаўскай».

Сярод студэнтаў ЕГУ сабрана каля 300 подпісаў супраць звальненьня Паўла Церашковіча. Віртуальныя подпісы ў падтрымку звольненага прафесара збіраюць і на сайце change.org, там сабрана больш за 550 подпісаў.

Канфлікт адміністрацыі ўніверсітэта і выкладчыкаў ЕГУ, якія аб'яднаныя ў прафсаюз выкладчыкаў «Платформа», доўжыцца ўжо некалькі месяцаў.

13 студзеня рэктар ЕГУ Анатоль Міхайлаў падпісаў загад аб аб'яўленні адкрытага міжнароднага конкурсу на замяшчэнне 17 выкладчыцкіх пасад.

Старшыня сената ЕГУ Павел Церашковіч выказаў сумнеў у справядлівасці і празрыстасці гэтага конкурсу. Асноўныя перасцярогі, якія маюць прадстаўнікі сената, звязаныя з тым, якім чынам будзе фармавацца конкурсная камісія.

9 лістапада прайшлі выбары ў сенат Еўрапейскага гуманітарнага ўніверсітэта, які працуе ў Вільні. Сенат - галоўны орган акадэмічнага самакіравання. У сенат прайшло 12 з 13 прадстаўнікоў дэмакратычнай платформы «За новы ЕГУ». Яна аб'яднала выкладчыкаў, якія не пагадзіліся з прапанаваным адміністрацыяй ВНУ планам развіцця ўніверсітэта.

«Платформа» хоча вярнуць праекту ЕГУ яго першапачатковы сэнс - эфектыўнага беларускага гуманітарнага ВНУ з еўрапейскай якасцю адукацыі і навуковай працы.