Кіроўца МНС трапіўся п'яным за рулём

Напярэдадні ён атрымаў узнагароду за добрую службу і адсвяткаваў гэтую падзею.

За амаль 20-гадовы стаж кіроўцы ў 44-гадовага мужчыны не было ніводнага парушэння. Але цяпер ён можа пазбавіцца не толькі пасведчання, але і працы.

Легкавы аўтамабіль, якім кіраваў 44-гадовы жыхар Баранавіцкага раёна - кіроўца адной з частак МНС, супрацоўнікі ДАІ спынілі суботняй раніцай у вёсцы Палонка. Падчас размовы міліцыянтам падалося, што ад кіроўцы пахне алкаголем, таму яны прапанавалі яму «дыхнуць» у алкатэстар. Прыбор, па дадзеных ДАІ, паказаў каля праміле алкаголю ў выдыханых парах, піша intex-press.by.

- Мужчына стаў тлумачыць, што напярэдадні ўвечары ездзіў у Менск на ўзнагароджанне - яму ўручалі ўзнагароду за выдатную службу. Як водзіцца, адзначыў гэтую справу. А раніцай яго жонка адправіла ў краму па хлеб, і, каб не ісці, ён вырашыў пад'ехаць некалькі сотняў метраў на машыне, - распавёў старшы дзяржаўтаінспектар АДАІ Баранавіцкага РАУС Андрэй Пераход.

Мужчыну даставілі ў наркалогію. Па словах Андрэя Перахода, у яго крыві было выяўлена каля 0,5 праміле пры максімальна дапушчальнай норме ў 0,3 праміле. Здавалася б, невялікае перавышэнне. Аднак, як растлумачылі ў ДАІ, нават за такую «дробязь» кіроўца можа пазбавіцца пасведчання кіроўцы - 2 лютага на яго склалі адміністрацыйны пратакол.

- Усякія сітуацыі ў жыцці бываюць. Але адна справа рызыкаваць пасведчаннем кіроўцы, спрабуючы даставіць чалавека ў бальніцу, гэта хаця б па-чалавечы зразумець можна. Але зусім іншая, садзіцца ў нецвярозым стане за руль з-за ляноты прайсці некалькі сотняў метраў да крамы, - адзначыў старэйшы дзяржаўтаінспектар. - Падобныя дзеянні недазвольныя і недаравальныя ні для звычайнага кіроўцы, ні тым больш для чалавека, які працуе ў такой структуры.

За амаль 20-гадовы стаж у затрыманага не было ніводнага парушэння па лініі ДАІ. Цяпер жа мужчына можа пазбавіцца не толькі пасведчання кіроўцы, але і працы кіроўцы МНС.

Даведацца ў кіроўцы, што падштурхнула яго сесці за руль у нецвярозым стане, і пачуць яго версію таго, што адбылося, не атрымалася - ад каментароў ён адмовіўся, сказаўшы толькі, што ў яго «паказала па нулях».