Яўген Плюшчанка пакінуў Алімпіяду праз траўму

Расейскі фігурыст Яўген Плюшчанка выключыў сябе са спісу індывідуальнага турніру на Алімпіядзе ў Сочы.

Пастанова была прынятая перад выступам фігурыста. Яўген Плюшчанка гэтым вечарам выйшаў на размінку і быў гатовы ўзяць удзел у спаборніцтвах. Аднак падчас размінкі пасля выканання шэрагу элементаў ён адчуў боль у спіне. У выніку спартовец наважыў не выходзіць на старт, піша РБК.

У гэты час спаборніцтвы ў індывідуальным турніры сярод мужчын працягваюцца. Спартоўцы выступаюць з кароткай праграмай.

Яўген Плюшчанка, які здабыў золата Алімпійскіх гульняў у Сочы ў камандным турніры, лічыўся фаварытам і ў індывідуальных спаборніцтвах.