Шэран Стоўн і Эрыка Робертса заклікалі не здымацца ў «Авелі»

Былыя палітвязні і іх сваякі звярнуліся да зорак Галівуда.

Былыя палітвязні, палітыкі і грамадскія актывісты Беларусі, а таксама сваякі вязняў сумлення, якія застаюцца за кратамі, заклікалі галівудскіх акцёраў Шэран Стоўн і Эрыка Робертса праявіць грамадзянскую салідарнасць і не ўдзельнічаць у здымках фільма «Авель».

Подпісы пад зваротам паставілі Марына Адамовіч, Анастасія і Зміцер Дашкевічы, Павел Вінаградаў, Ірына Халіп, Марына Лобава, Уладзімір Някляеў, Павел Севярынец, Мікіта Ліхавід, Зміцер Дрозд і іншыя, усяго 25 чалавек.

Адмовіцца ад стварэння фільма аўтары звароту таксама заклікалі рэжысёра фільма «Авель» Уільяма дэ Віталя, піша БелаПАН.

Былыя палітвязні, а таксама іх сваякі адзначаюць, што падзеі, паказаныя ў фільме, з'яўляюцца трагічнымі не толькі для іх, але і для ўсёй краіны. «19 снежня 2010 года была жорстка разагнаная ўладамі мірная акцыя пратэсту супраць фальсіфікацый выбараў у Беларусі. Больш за тысячу дэманстрантаў у гэтую ноч былі затрыманыя. Сем з дзевяці кандыдатаў у прэзідэнты апынуліся ў турме КДБ. Сотні іх прыхільнікаў былі бесчалавечна збітыя і арыштаваныя на тэрміны ад 15 сутак да чатырох гадоў зняволення. На гэты час у турме строгага рэжыму знаходзіцца кандыдат у прэзідэнты Мікалай Статкевіч, які атрымаў найбольшы прысуд за мірную акцыю пратэсту - шэсць гадоў. Палітычна матываваныя прысуды працягваюць выносіцца ў нашай краіне па гэты дзень», - гаворыцца ў дакуменце.

На жаль, падкрэсліваецца ў звароце, «гэтыя трагічныя падзеі скажона адлюстраваныя ў сцэнары фільма, які закліканы легітымізаваць у вачах грамадства дзеянні ўлады, накіраваныя супраць уласных грамадзян». Аўтары дакумента лічаць гэты праект «бруднай гульнёй беларускіх уладаў».

«Мы выказваем вялікае шкадаванне і расчараванне ад таго, што ўлада выкарыстоўвае вас, каб замацаваць сваё хлуслівае адлюстраванне рэчаіснасці. Замест здымак у кіно вы ўдзельнічаеце ў здымках прарэжымнага, агітацыйнага фільма. Мы заклікаем вас да грамадзянскай салідарнасці. Калі ласка, адмоўцеся ўдзельнічаць у бруднай гульні беларускіх уладаў», - гаворыцца ў звароце.

Палітвязні і іх сваякі таксама спадзяюцца знайсці паразуменне з іншымі зоркамі сусветнага кінематографа ў выпадку паступлення ім прапаноў зняцца ў «Авелі».

Як лічыць старшыня кампаніі «Гавары праўду» Уладзімір Някляеў, яшчэ не факт, што Эрык Робертс і Шэрон Стоўн будуць удзельнічаць у здымках фільма. «Хутчэй за ўсё - гэта піяр-ход, каб прыцягнуць увагу да здымак з мэтай павелічэння бюджэту фільма за кошт дзяржаўных сродкаў Рэспублікі Беларусь. Дзеянні стваральнікаў фільма паказваюць, што яны імкнуцца павялічыць бюджэт фільма», - заявіў ён.

Някляеў не выключае, што ў павелічэнні бюджэту фільма зацікаўленыя і некаторыя беларускія чыноўнікі. «Бо хтосьці ж прапанаваў для здымак цэнтр сталіцы, хоць у іншай краіне гэта каштавала б мільёны, хтосьці ж нагнаў бясплатных масавікоў», - адзначыў ён.

У сваю чаргу, Марына Адамовіч, жонка палітвязня Мікалая Статкевіча, адзначыла, што не стала б звяртаць увагу на здымкі «Авеля», калі б не дзеянні ўладаў. «Я маю на ўвазе перакрыцце праезнай часткі праспекта ў моцны мароз, спыненне руху грамадскага транспарту, бо менавіта гэта і інкрымінавалася ўдзельнікам Плошчы», - паведаміла яна.

«Для мяне гэты фільм ніякай цікавасці не ўяўляе. Я проста хацела б яшчэ раз звярнуць увагу на падвойныя стандарты уладаў, на парушэнні правоў чалавека, на тое, што ў Беларусі яшчэ сядзяць у турме людзі, асуджаныя за Плошчу, падзеі якой у фільме хочуць падаць у скажоным і ганебным выглядзе сусветнай супольнасці», - сказала Адамовіч.

Нагадаем, кінастужка «Авель» ствараецца кампаніяй «Нонстоп Медыя» па замове Міністэрства культуры. На яе вылучана больш за 20 млрд. рублёў (2,17 млн. даляраў ЗША). Рэжысёр-пастаноўшчык карціны - выхадзец з Украіны каскадзёр і пастаноўшчык трукаў Уільям дэ Віталь.