На набярэжнай у Сочы тэрмінова ўзвялі кафэ для сняданку Пуціна

У канцы мінулага тыдня на Імярэцінскай набярэжнай у Сочы раптам з'явілася група гастарбайтэраў, якая пачала весці загадкавыя будаўнічыя працы.

Падзеі развіваліся імкліва: піша NEWSru.com.

Работы адразу насцярожылі ўважлівых сочынцаў, якіх раней абурыла, як была забудаваная бетонам цэнтральная набярэжная Сочы. У прыватнасці, блогер Аляксандр Валаў выказаў здагадку, што і на новенькай Імярэцінскай набярэжнай, абсаджанай да ўрачыстасцяў хвойнай расліннасцю, пакуль не раз'ехаліся алімпійскія госці, пачалася чарговая камерцыйная будоўля з санкцыі ўладаў горада.

Пазней гэтыя здагадкі пацвердзілі карыстальнікі ў «Фэйсбуку», якія сталі сведкамі таго, як «некалькі чалавек у форме МНС укладвалі драўляны насціл, акурат у тым месцы, дзе нядаўна былі высаджаныя хвоі». Цікаўныя мінакі пацікавіліся ў супрацоўнікаў аб'екта, што гэта і чаму ён так спехам будуецца. Ім паведамілі, што гэта «сцэна такая будзе, для мерапрыемстваў там усялякіх алімпійскіх, конкурсаў, можа, нават для выступлення калектываў якіх творчых».

Да выходных аб'ект быў ужо дабудаваны, і на яго тэрасе з'явіліся першыя «наведвальнікі», якія пілі каву, «акідваючы гаспадарскім поглядам сямікіламетровую набярэжную». Сочынскія блогеры зусім зажурыліся, прыкінуўшы, што хутка ў гэтым месцы, а затым і ў іншых па ўсёй набярэжнай пачнуць у аналагічных забягалаўках смажыць шашлыкі і гучна «круціць» мясцовыя хіты.

Аднак, як пазней разабраліся сочынцы, усё апынулася цікавей. На «Первом канале» ў суботу выйшаў рэпартаж, з якога вынікала, што раней у гэты дзень прэзідэнт Уладзімір Пуцін абмеркаваў з кіраўнікамі МАК атмасферу зімовых Гульняў «падчас прагулкі па набярэжнай і ў адкрытым кафэ», з вядомымі кадрамі з узбярэжжа.

Цяпер блогеры варожаць, ці будзе знесеная гэтая адзінокая драўляная пабудова, збудаваная пад эксклюзіўны сняданак, ці яна цяпер набыла недатыкальны статус культавай славутасці.