Суд пакінуў сайт «Вясны» ў «чорным спісе»
- 18.02.2014, 18:38
- 2,958
Суд Цэнтральнага раёна Менска спыніў справу паводле скаргі намесніка старшыні ПЦ «Вясна» Валянціна Стэфановіча.
Ён абскардзіў пастанову Генпракуратуры Беларусі аб унясенні сайта spring96.org ў «чорны спіс», піша «Інтэрфакс».
«Суд Цэнтральнага раёна г. Менска вынес вызначэнне, згодна з якім я прызнаны неналежным пазоўнікам, бо не з'яўляюся ўласнікам сайта і мае асабістыя правы з прычыны ўнясення сайта ў спіс абмежаванага доступу не парушаныя», - паведаміў Валянцін Стэфановіч.
«Суд пастанавіў спыніць справу паводле грамадзянскай справы. Паводле пастановы суда я не маю права абскардзіць вызначэнне ў касацыйным і наглядным парадку, але магу падаць прыватную скаргу цягам10 дзён», - удакладніў ён.
Валянцін Стэфановіч заявіў, што «ўважае гэтую пастанову за незаконную і мае намер абскардзіць яе на міжнародным узроўні - у КПЧ ААН, вычарпаўшы нацыянальныя механізмы абароны».
Нагадаем, Валянцін Стэфановіч атрымаў адказ на свой зварот у Генеральную пракуратуру Беларусі, датаваны 10 снежня 2013 г, які тычыўся ўнясення сайта ў «чорны спіс».
Праваабаронца патлумачыў, што «ўключэнне ў спіс абмежаванага доступу азначае, што сайт заблакаваны для наведвання ў дзяржаўных установах, установах сістэмы адукацыі – універсітэтах ды іншых навучальных установах». «Правайдэры, якія выконваюць платныя паслугі, абмяжоўваюць наведванне сайта ў інтэрнэт-кавярнях, шэрагу буйных бібліятэк Менска», - удакладніў праваабаронца.