Чарга на літоўска-беларускай мяжы вырасла ў паўтара раза
- 19.02.2014, 10:50
- 3,960
Дзяржпамежкамітэт просіць кіроўцаў грузавікоў звярацца з інфармацыяй на пунктах пропуску, каб не трапіць у самую доўгую чаргу.
Як піша «Ежедневник», нагадаўшы аб дадатковых мерах літоўскай мытні для прадухілення незаконнага абароту бензіну і дызельнага паліва з Беларусі, прэс-служба ГПК паведамляе: «адбылося запаволенне прыёму мытнымі органамі Літоўскай Рэспублікі грузавых аўтамабіляў, аформленых кантрольнымі службамі Рэспублікі Беларусь. Паводле інфармацыі, якая маецца ў распараджэнні мытных органаў Рэспублікі Беларусь, Літоўскім бокам прымаецца ў паўтара раза менш грузавых транспартных сродкаў, чым устаноўлена нормамі пропуску, узгодненымі з сумежным бокам».
Так, на 17 лютага, чарга ў пункт пропуску «Каменны Лог» была самай доўгай, склаўшы 400 грузавікоў. Улічваючы, што сітуацыя на мяжы змяняецца даволі часта, у ГПК раяць звярацца з інфармацыяй на сайтах, каб выбраць найбольш кароткі шлях.