Польшча гатовая прыняць бежанцаў з Украіны
10- 19.02.2014, 15:19
- 11,475
Па словах прэм'ера Польшчы Дональда Туска, улады прымежных з Украінай ваяводстваў гатовыя да «чорнага сцэнара».
Польская ўлада гатовая да таго, каб прыняць пацярпелых падчас апошніх сутыкненняў у Кіеве і магчымых бежанцаў з Украіны.
Як перадае ўласны карэспандэнт УНІАН у Варшаве, пра гэта заявіў кіраўнік урада Польшчы Дональд Туск у Сейме.
«Ёсць вялікая колькасць месцаў у шпіталях Міністэрства ўнутраных спраў, таксама зарэзерваваныя месцы ў бальніцах Міністэрства абароны. Мы падрыхтаваныя да таго, каб прыняць вялікую колькасць пацярпелых», - сказаў ён.
Па словах прэм'ера Польшчы, таксама ўлады прымежных з Украінай ваяводстваў гатовыя да «чорнага сцэнара», які «ў нейкім сэнсе» цяпер мае месца.
«Мы ў пастаянным кантакце са службамі так, каб пацярпелыя, параненыя, а таксама магчымыя ўцекачы атрымалі добра падрыхтаваныя месцы. Польшча добра падрыхтаваная да такой магчымасці», - сказаў Туск.
Ён нагадаў, што ў польскіх бальніцах знаходзяцца 11 пацярпелых украінцаў.
Туск дадаў, што раней абмяркоўваў магчымасць прыняцця пацярпелых украінцаў з лідарамі іншых дзяржаў Вышаградскай чацвёркі, у якую ўваходзяць Чэхія, Венгрыя і Славакія.