Дэманстранты занялі будынак Дзяржтэлерадыё Украіны

Пратэстоўцы ўвайшлі ў будынак Дзяржаўнага камітэта тэлебачання і радыёвяшчання.

Ён размяшчаецца на вуліцы Прарэзнай, 2, каля Майдана Незалежнасці. Па словах аднаго з удзельнікаў штурму, у будынку будзе наладжаны начлег і медпункт для актывістаў, паведамляе «РБК-Украіна».

Нагадаем, 18 лютага ў цэнтры Кіева адбыліся найбольш жорсткія сутыкненні паміж дэманстрантамі і сілавікамі. Яны пачаліся ўчора раніцай адразу пасля адкрыцця пасяджэння Вярхоўнай Рады, на якім разлічвалі вырашыць палітычны канфлікт у краіне. Па мітынгоўцах стралялі з драбавікоў, спецназаўцы выкарыстоўвалі гранаты, гумовыя кулі і карцеч. Вакол Вярхоўнай Рады актывісты ўзвялі новыя барыкады, аднак неўзабаве іх выціснулі з урадавага квартала. Медыкі і дэпутаты паведамілі пра пяць загінулых. Вечарам і ноччу, пасля пачатку зачысткі самога Майдана Незалежнасці, колькасць забітых вырасла да 25 чалавек. Некалькі сотняў дэманстрантаў атрымалі раненні.