На бабруйскага блогера завялі чатыры крымінальныя справы

У Бабруйску працягваюцца рэпрэсіі ў дачыненні да Алега Жалнова.

За апошні год, кажа блогер, на яго было заведзена 14 спраў: адна грамадзянская, дзевяць адміністрацыйных, чатыры крымінальныя. Яшчэ адна крымінальная распачатая ў дачыненні да яго сына Аляксея Жалнова. Па некаторых справах судовыя працэсы ўжо прайшлі, але большасць судоў яшчэ чакае бабруйчаніна наперадзе, паведамляе ПЦ «Вясна».

- Сёння праводзіцца судова-псіхіятрычная экспертыза па Аляксею, - распавядае Алег Жалноў. - Для сына мы заключылі дамову з адвакатам. Я буду карыстацца правам на абарону, але паколькі грошай няма, скарыстаюся паслугамі бясплатнага адваката.

Пакуль даты судоў па крымінальных справах не прызначаныя, праводзяцца праверкі. Большасць заведзеных спраў тычыцца леташняга выпадку каля будынка ДАІ.

- Да гэтага часу правяраюць маю тэхніку, нібыта там знайшлі порна, а гэта артыкул 343 Крымінальнага кодэкса. Артыкул 369: за размяшчэнне відэазапісаў правапарушэнняў з боку міліцыі ў Інтэрнэце - распачатая крымінальная справа. Яшчэ адна крыміналка пагражае мне па артыкуле №340 «Загадзя ілжывае паведамленне аб небяспецы», ідзе праверка. Гэта следства майго візіту ва УУС, калі адзін з міліцыянтаў успрыняў мае рэчы як пагрозу бяспецы і аформіў гэта як заяву аб выбуху, які рыхтуецца, - кажа блогер.

За апошнія месяцы Жалнова больш за 40 разоў выклікалі ў міліцыю для апытанняў і допытаў.

- Пры гэтым афіцэры, якія падпісвалі позвы, часам не з'яўляліся на службу ў прызначаны час, гэта значыць, толькі б выклікаць. Чатыры разы ў адносінах да мяне ўжывалі фізічную сілу, двойчы апраналі кайданкі, канфіскавана 13 адзінак тэхнікі, - падсумоўвае Алег Жалноў.

Нагадаем, Алег Жалноў вядомы сваім блогам. У ім бабруйчанін размяшчае аўдыё і відэаматэрыялы, на якіх фіксуе дзеянні міліцыі і ДАІ, якія лічыць незаконнымі.